Ngai rơlô, làng bol kis tàm ƀòn Ia Nueng, sàh Biển Hồ, ƀòn dờng Plaiku tơrgùm tàm hìu niam chài mpồl bơtiàn nàng pơgồp bal jơnau đơs gơwèt mờ gùng dà broă rơndăp tăp sèng mpồl lơh broă sră nggal. Ồng Ksor Kroyh, 64 sơnam tơlik nùs nhơm ring bal mờ gùng dà broă lơh rề ơnàng ù tiah sàh Biển Hồ bơh broă tơrgùm bal mờ ală sàh Nghĩa Hưng, sàh Chư Đang Ya, kơnhoàl Chư Păh bal mờ sàh Hà Bầu, kơnhoàl Đăk Đoa, mờ sơrbì kấp ƀòn dờng là ƀòn dờng Pleiku. Jăt ồng, broă tam gơl do di gơlan geh dong kờl làng bol bơsong ală sră nggal mhar rơlao. Mơya, tơnơ̆ tŭ tơrgùm bal, khà làng bol jơi bơtiàn ờ gal cau tàm sàh pa gơguh uă rơlao 2 dơ̆, tus 47% den tàng pal tơnguh mpồl kwang bàng lơh broă là cau làng bol jơi bơtiàn ờ gal cau, tàm hơ̆ uă ngan là tàm gah adăt boh lam, nàng dong kờl làng bol.

Ồng Ksor Kroyh pin dờn: “Niam ngan, sơrbì anih lơh broă tàm gùl là niam ngan. Làng bol kờñ bơta lơi den lơh broă tơn, ờ gơkòl. Pal tơnguh kwang bàng đah adăt boh lam. Di lah kòn cau Jrai den wă jơnau đơs kòn cau Jrai rơlao, cau Yoan den niam bè sră nggal, mơya ờ wă loh jơnau đơs kòn cau dê. Añ kơ̆p kờñ tơnguh kwang bàng lơh broă cau làng bol jơi bơtiàn ờ gal cau”.

Nàng broă ai pơgồp jơnau đơs lơh geh uă cồng nha, gơnoar atbồ sàh bal mờ ală mpồl lơh broă tàm sàh Biển Hồ neh mblàng yal uă. Sră tờm mờ jơnau tơrgùm bal broă rơndăp tăp sèng geh cih tàm anih yal tơngit điện tử mờ lir tềng hìu lơh broă, hìu pơrjum ƀòn… nàng làng bol in git tơl. Mò Rcom H’ Myữ, Củ tịc Anih duh broă Mặt trận Dà lơgar Việt Nam sàh Biển Hồ pà git: anih pờ tơlik jơnau đơs tàm sàh, ală bơta tờm internet mpồl bơtiàn ndrờm geh yal mblàng, drơng broă ai pơgồp jơnau đơs do in: “Pah ngai, tàm tŭ 5 jơ 30 drim mờ mho, loa pờ tơlik jơnau đơs bơh sàh ndrờm pờ tơlik. Bơh loa yal, bơh zalo mờ facebook dê, den mặt trận Dà lơgar neh lơh nàng ai ală cau lam bồ mpồl lơh broă mặt trận dà thôn, ƀòn in git bè gùng dà broă lơh bơh ală kấp dê bè broă tơrgùm bal càr mờ ƀòn dờng Pleiku, kung bè sàh, sơnah ƀòn. Tŭ do, làng bol neh git broă rơndăp tăp sèng do”.

Bal mờ sàh Biển Hồ, ală mpồl lơh broă kấp sàh tàm gùt càr Gia Lai kung neh lơh jăt broă lơh pơgồp jơnau đơs bơh cau tĕ khà dê bè gùng dà broă rơndăp tăp sèng ală sàh. Ală broă lơh geh ngui ndrờm bal, tàm hơ̆ geh bal pờ tê ring bal tàm ală dơ̆ pơrjum ƀòn, ha là jào sră tus tơl hìu gơwèt mờ ală cau tĕ khà ờ gơtùi tus pơrjum tơn. Khà măt cau tĕ khà geh sền wơl nền nòn, gàr niam broă ờ gơtìp cau lơi gơlời. Lài mờ hơ̆, tàm Pơrjum dơ̆ 19 Mpồl đơng lam Đảng ƀộ càr Gia Lai khoă XVI (pờ ơnàng), càr Gia Lai neh ring bal gùng dà broă lơh tơrmù bơh 218 mpồl lơh broă sră nggal kấp sàh gơmù gam 77 mpồl lơh broă. Tơnơ̆ mờ tŭ lơh gơs broă pơgồp jơnau đơs, Mpồl duh broă làng bol kấp sàh mờ Anih duh broă Măt trận Dà lơgar Việt Nam jăt sền, tơrgùm bal, jào tus kấp kơnhoàl mờ kấp càr in sền wơl, ai tơlik jơnau lơh nền tàm ală pơrjum bơh Mpồl duh broă làng bol ală kấp dê. Tŭ mpồl lơh broă sră nggal pa geh crơng gơs rơ̆p lơh mơ ală broă pơn jăt tai nàng lơh gơs broă kwang bàng, bañ lời gơkòl broă drơng làng bol.