Tàm ƀòn 6, sơnah ƀòn Tân Lợi, ƀòn dờng Buôn Ma Thuột – tiah geh rlau 1 rbô hìu bơnhă làng bol, broă lơh mblàng yal, ai jơnau đơs geh lam lơh niam ngan, ring bal mờ dờp geh bơta lơh jat jơh nùs ngan bơh làng bol. Ồng Nguyễn Ngọc Thịnh, lam bồ mpồl ai jơnau đơs làng bol pà git: “Bol hi lam lơh mblàng yal tàm ală anih yal tơnggit jơnau, mờ kung yal anih tơrgùm tàm hìu pơrjum ƀòn dê. Tus tŭ do, làng bol chờ hờp ngan, ring bal uă mờ jơnau lơh nền bơh Đảng mờ Dà lơgar dê tàm broă tơmut bal, tơrmù lơyah mpồl lơh broă sră pơ àr gơnoar atbồ, mờ kơp kờñ broă lơh kac màng do rơp lơh geh cồng nha”.

Tàm ală ƀòn, làng bol jơi bơtiàn dồ êt nă cau kung ai tơnggŏ bơta sền gròi uă ngan tus jơnau lơh nền do. Ồng Y Rul Niê, ơm tàm ƀòn Pốt A, kơnhoàl Cư Mgar pà git, làng bol kung sền gŏ ală kal ke, bòl glar tàm tơngai bơh chờm tơnơ̆ tŭ tơmut bal, mơya ndrờm pin dờn ƀòn lơgar rơp niam rlau: “Sàh do mờ sàh ndai den pal đơs là ngài ngan, tơmut bal den ù tiah ơnàng rlau, làng bol lòt rê mờ kwang bàng lơh broă kung kal ke. Mơya neh lơh ngan den pal bơsong, kwang bàng pal geh pràn jak rlau mờ lài. Tềng đap mat den kal ke mơya lơh niam den rơp lơh gơtùi gơ dê”.

Gơ wèt mờ uă cau, bơta pin dờn mờ kơp kơnờm bơtàu tơnguh ờ mìng geh ai tơlik tàm kâp càr, kâp sàh mờ gam pin dờn tàm jơh bal ală kơp kơnờm bơtàu tơnguh lơh sa – mpồl bơtiàn đah ală tiah. Bi Huỳnh Trần Minh Đức ơm tàm ƀòn dờng Buôn Ma Thuột đơs: “Dilah Dăk Lăk tơmut bal mờ Phú Yên den rơp lơh gơlik bơta tơrbŏ bal ù tiah pràn ngan. Lơh sa dà lềng pơgồp bal mờ lơh sa suơn sre Tây Nguyên dê rơp lơh gơlik bơnàng jă bơtàu tơnguh kơ̆ kơljap. Kă bro phan, logistic kung rơp ƀuơn rlau”.

Ai ồng Nguyễn Ngọc Hiên, ơm tàm sơnah ƀòn Tân Lợi là cau đềt mềr jơh bal 2 ƀòn tờm là Dăk Lăk mờ Phú Yên đơs: “Ƀòn mè añ dê tàm Phú Yên, añ kis tàm Dăk Lăk bơh tŭ gam dềt. Tŭ do dilah 2 càr tơmut bal den chờ hờp ngan. Dăk Lăk geh bơnơm, geh brê, geh dà lềng, tŭ pơgồp bal den rơp pràn ngan, lam dà lơgar he bơtàu tơnguh rlau”.

Bơdìh mờ ring bal jơnau lơh nền dờng bè tơmut bal, rơndap tap sèng mpồl lơh broă sră pơ àr gơnoar atbồ, làng bol Dăk Lăk kung tă pơgồp jơnau đơs bè ală bơta kuơmàng ngan rlau jơh gơ wèt mờ broă lơh kwang bàng tàm mpồl kwang bàng gơnoar atbồ kâp hơ đơm 2 kâp mờr tus. Ồng Hồ Hồng ơm tàm sàh Quảng Tiến, kơnhoàl Cư Mgar song dơpă đơs: “Añ gam geh bơta kơlôi rơcang, tŭ do tơmut bal gal bè do den gơ rê wơl rài ƀao kâp sap sèng halà ờ. Den tàng añ kơp kờñ là dilah tơmut bal den pal lơh jak chài, tam gơl wơl sră pơ àr gơnoar atbồ, lơh gơ in sơrbac mhar”.

Mò Nguyễn Thị Xuân ơm tàm ƀòn dờng Buôn Ma Thuột kung đơs là, tơmut bal, rơndap tap sèng là di mơya cồng nha rơp gơ wèt tàm bơta niam kwang bàng: “Añ gŏ jơnau lơh nền tơmut bal là di. Làng bol ndrờm bè cau lơi kung ring bal lơm. Kơp kờñ dà lơgar rơ wah kwang bàng geh pràn jak, lơh broă geh cồng nha nàng làng bol ngai sơlơ hờm ram, gơboh gơbài”.

Broă rơndap tap sèng, tơmut bal mpồl lơh broă sră pơ àr gơnoar atbồ là broă lơh kuơmàng tàm tơngai tam gơl pa mpồl kwang bàng lơh broă dà lơgar jat gùng dà tơrmù lơyah, geh cồng nha. Bơta ring bal, pin dờn mờ kơp kơnờm bơh làng bol dê là bơta gơn kơnờm dờng ngan nàng ală kâp gơnoar atbồ lam lơh gơtùi jơnau lơh nền do, lam dà lơgar ngai sơlơ bơtàu tơnguh kơ̆ kơljap.