Bơh ngai do (01/7), Lâm Đồng, Bình Thuận mờ Dăk Nông ngan ngồn tơmut bal, gơs càr Lâm Đồng pa, geh bă ù dờng ngan rlau jơh dà lơgar, khà kờp làng bol gal ngan rlau jơh tiah đah jum tàm gùl lơgar mờ Tây Nguyên. Tàm Dăk Nông, làng bol geh uă bơta kơp kơnờm tơnơ̆ tŭ tơmut bal rơp lơh gơlik bơta chul chồl pràn kơldang nàng tiah do in bơtàu tơnguh lơh sa mpồl bơtiàn, kuơmàng là lòt nhơl tŭ ngui bơta pràn bơh ală tiah mùl geh bơta pràn bè lòt nhơl dê.

Bi Nguyễn Anh Quốc ơm tàm ƀòn drà dềt Ea T’ling, kơnhoàl Cư Jut, càr Dăk Nông (lài do) pà git, bơh tŭ crơng gơs nam 2004, càr neh bơtàu tơnguh mhar ngan, rài kis làng bol tam gơl loh làng ngan. Bi Quốc kơp kơnờm, tŭ tơmut bal mờ 2 càr geh uă bơta pràn bè lòt nhơl là Lâm Đồng mờ Bình Thuận den Dăk Nông rơp geh tơnguh tai bơta gơn kơnờm, ngui niam ngan rlau jơh ală bơta pràn mùl geh. Ai ồng Điểu Nơi, kòn cau M’nông ơm tàm ƀòn Diêng Ngaih, sàh Dăk Rtih, kơnhoàl Tuy Đức yau kơp kờñ, tơmut bal 3 càr rơp lơh gơlik bơta bơtàu tơnguh ai ƀòn lơgar in. Càr pa rơp geh broă lơh sa dờng mờ rơp sền gròi bơcri priă ai tiah sar lơgar ngài bè ƀòn Diêng Ngaih in: “Tơmut bal den làng bol kòn cau M’nông tàm Dăk R’tih kung gam kơlôi rơcang lơh sa, dùl nùs jat Đảng, dà lơgar. Cau M’nông kơp kờñ tơnơ̆ tŭ tơmut bal rơp bơtàu tơnguh niam rlau tiah làng bol kòn cau, kwang đơng lam bồ càr pa rơp sền gròi bơcri priă rlau tai ai tiah jơi bơtiàn dồ êt nă cau in, tàm hơ̆ geh làng bol tàm Dăk R’tih. Gùng rơndeh lòt mhar rơp geh lơh nàng làng bol in lòt rê, kă bro phan ƀuơn ƀuài”.