Drim ngai 19/02, tàm ƀòn dờng Pleiku, càr Gia Lai, Ling mpồl 15 bơyai lơh dờng màng Dơ̆ tơngkah kir sơnrai 40 nam Ngai bơhiàn Ling mpồl. Tàm 40 nam do, Ling mpồl 15 lơh jăt bal bal kơnòl broă lơh sa mờ sền gàr dà lơgar.

Tŭ do, mpồl lơh broă do ătbồ rlau 44 rbô 295 lồ kau su mờ mờr 400 lồ kòi, phan sa, bal mờ 6 nơm măy lơh bơsơ̆t kau su bal mờ pràn lơh broă 55 rbô tấn dồ nam. Ling mpồl 15 neh tă pơgồp rlau 2 rbô 800 tơmàn đong tàm kes priă dà lơgar dê, lơh geh broă lơh sùm ai rlau 16 rbô nă cau lơh broă in, tàm hơ̆ rlau 60% là cau jơi bơtiàn dồ êt nă cau. Bal bal mờ bơtàu tơngguh lơh sa, Ling mpồl 15 sùm sền gròi broă lơh hòi jà làng bol, dong làng bol tơn jơh jơgloh tơrmù rƀah, bơ̆t bơtàu ƀòn lơgar pa. Mpồl neh dong lơh pa mờ lơh niam wơl rlau 1 rbô 500 kơi sồ gùng lòt, 400 kơi sồ gùng che đèng, bal mờ uă hìu pơrjum cribơyai mpồl bơtiàn, hìu sơnơm, hìu bơsram.