Ling Sền gàr tiah nhàr lơgar càr Gia Lai (lài do hòi là Mpồl Lơngăp lơngai phàu crong) geh lơh bơh nam 1965, mờ bơta dong kờl bơh ală càr tiah đah Tô dà lơgar dê. Tàm rài tam lơh mờ bol sò tơm thàm phà dà lơgar, mpồl neh tus bal lơh gĭt nđờ rhiang dơ̆ tam lơh, gơsơ̆t chơ̆t mờ kŭp krơ̆ gĭt nđờ rhiang nă cau sò tơm, pơgồp bơnah tơngklàs tiah đah Jum, tơrgùm dùl dà lơgar. Tơnơ̆ nam 1975, Ling Sền gàr tiah nhàr lơgar càr Gia Lai pơn jăt tai lơh kơnòl broă sền gàr tiah nhàr lơgar, is ồn tàm dơ̆ tam lơh dră wơl bol Khmer Đỏ.

Tŭ do, mpồl ătbồ rlau 80 kơi sồ gùng nhàr lơgar rềp càr Rattanakiri, lơgar Campuchia, sùm lơh gơs jak kơnòl broă sền gàr tiah nhàr lơgar mơkung dong kờl làng bol bơtàu tơngguh lơh sa – mpồl bơtiàn bơh ală broă lơh bè “Dong kờl oh lòt bơsram”, “Hìu ram ai cau rƀah tiah nhàr lơgar in”, “Kơnrồ dra ai cau rƀah in”. Mờ uă broă lơh geh pơnrơ ngan, Gah đơng lam Ling Sền gàr tiah nhàr lơgar càr Gia Lai chờ hờp geh Củ tịc lơgar pà Huân cương Sền gàr Dà lơgar khà Bàr; Củ tịc Anih duh broă Làng bol càr Gia Lai kung jàu sră jờng rơ ai 9 mpồl cau mờ 9 nă cau jak ngan in.