Tŭ jiơ nha bồng bi tơngklàs gơpar lĭp lơ̆p tềng hơđang rơkàng hìu Gơlăng Độc Lập klo ngai 30 nhai 04 nam 1975 neh gơlòt mŭt tàm jơnau kah yau jơi bơtiàn dê bè dùl broă dờng màng ngan- ngai tiah đah Jum tơngklàs jơh, dà lơgar tơrgùm dùl, ù tiah dà ia gơrê bal dùl anih. Hơ̆ ờ mìng là tam lơh jai pha dờng ngan bơh làng bol Việt Nam dê tàm rài tam lơh dră wơl bol sò tơm Mỹ thàm phà dong klàs dà lơgar bềng bòl glar kal ke ngan, mờ gam là rùp pơrya àng gơcrà ngan bơh nùs nhơm khin cha jak chài kăc màng dê, bơh nùs nhơm kơ̆p kờñ ngan lơngăp lơngai is, kơnờm tàm bơta pràn is mờ bơta pràn tam klăc dờng jơh gùt jơi bơtiàn.

Tam lơh jai pha ngai 30 nhai 04 nam 1975 là cồng nha jơh nùs lơh ngan lŭ lòs bơh jơi bơtiàn Việt Nam dê bè dùl dà lơgar tơrgùm dùl, ờ rơgơi gơtìp tam cah is tài bơh khăt dùl mpồl gơjrañ kơ wềng lơi. Củ tịc Hồ Chí Minh- Kwang đơng lam jak chài ngan bơh jơi bơtiàn dê neh đơs nền jơnau song ờ tŭ lơi roh: “Lơgar Việt Nam là dùl, jơi bơtiàn Việt Nam là dùl. Dà dờng digơlan soăt, bơnơm digơlan siar, mơya jơnau đơs hơ̆ ờ tŭ lơi tam gơl”. Tam lơh jai pha ngai 30 nhai 04 nam 1975 là cơng tàng tơnggŏ ngan ngồn ai jơnau đơs bơh tŭ tơngai “Ờ geh bơta lơi kwơ rlau lơngăp lơngai is khăt gơboh is”.

Tam lơh pha lin dờng kàl prang nam 1975 kung neh lời wơl tềl kah pràn kơldang tàm muh măt ală lơgar, lơh hô hơng uă ngan srơh dong klàs jơi bơtiàn tàm uă kơnhoàl ù tiah: Á, Phi, Mỹ Latiñ; pơn jờng ală jơi bơtiàn ñă ntàu dră wơl nùs nhơm sò tơm thàm phà pa mờ ai geh wơl gơnoar khăt gơboh is, lơngăp lơngai is. Hơ̆ là tam lơh jai pha bơh jơnau dipal tềng đăp gơnoar rồn bơklơn, jơnau đơs nền tềng đăp mpồl bơtiàn ală lơgar, là: dùl jơi bơtiàn bulah dềt rơhền mơya dilah geh jơnau dipal, tam klăc mờ nùs nhơm kơ̆p kờñ kơ̆ dơn, bal mờ bơta dồ nùs bal, dong kờl àng sơrdah bơh gơ̆p bơyô ală lơgar dê, bơh ală mpồl gơguh jak mờ bơh làng bol gơboh ring lơngai tàm dunia dê den ngan ngồn rơ̆p tam lơh jai pha tềng đăp ală mpồl pràn rlau tus uă dơ̆.

Jơnau yal bơr “Lơgar Việt Nam là dùl, jơi bơtiàn Việt Nam là dùl” bơh Củ tịc Hồ Chí Minh dê ờ mìng là dùl jơnau song, dùl pơlam gùng dờng kwơmàng, mờ gam jơnau sồr bơh plai nùs bơh jơi bơtiàn dê.

Tàm ñhŭ ồs tam lơh, jơnau đơs hơ̆ gơgơs bơta pràn dờng ngan, lơh gơlik bơta gơdan pràn kơldang, lơh gơlik bơta gơn kơnờm ai gĭt nđờ tơlak nă cau Việt Nam in cơnđòa lòt tus tiah tam lơh bal mờ nùs nhơm kơ̆p kờñ ngan “crăp rơcăng chơ̆t phi să ai Dà lơgar pal kis”. Jơnau bơh Củ tịc Hồ Chí Minh dê là jơnau hòi tơrgùm dờng màng ngan, là rùp pơrye bơh nùs jơh nùs lơh ngan sơrlèt jơh ală jê sồt muăt jrùm, bòl glar kal ke, nàng ai tus geh lơngăp lơngai is, khăt gơboh is ai jơi bơtiàn in, tơrgùm dùl ai dà lơgar in mờ chờ hờp hờm ram ai Làng bol in.

Di tòm rlau nggùl rài lòt gan kờp bơh ngai dà lơgar tơrggùm bal dùl sèng, mơya ală jơnau mpong ntas bơh jơnau đơs crih chờ hờp kung gam mpong ntas sùm tàm hwềng nùs jơi bơtiàn Việt Nam dê. Ală rơnàng cau Việt Nam ngai do mờ tơnơ̆ do sùm sùm prăp kah dà kơlhề mờ bơta phi să dờng ngan tài lơngăp lơngai is bơh Dà lơgar dê, tài chờ hờp hờm ram bơh làng bol dê mờ tài bơta gam sùm, bơtàu tơngguh bơh jơi bơtiàn dê.

Bol he tơlik nùs nhơm gĭt ưn ngàn uă ngan gơ wèt mờ gơ̆p bơyô ală lơgar ală mpồl gơguh jak, ală lơgar mpồl sàh hội củ nghiã oh mi, ală mpồl dong kờl kòn bơnus mờ làng bol gơboh kờñ ring lơngai tàm làm gùt dunia- neh lòt bal, dong kờl mờ dồ nùs bal mờ lơgar Việt Nam tàm sùm ală nam nhai tam lơh dong klàs jơi bơtiàn, kung bè tàm broă lơh bơ̆t bơtàu wơl mờ bơtàu tơnguh dà lơgar tơnơ̆ tam lơh mờ bol sò tơm thàm phà.

Tơnơ̆ 50 nam dà lơgar tơrgùm dùl, bol he neh geh tơl bơta khin cha kơ̆ dơn, tơl bơta pin dờn, bơta pơñiờ să mờ tơl toh glài nàng sơrlèt gan jê sồt muăt jrùm bal mờ gơ̆p wèt sền bal hờ đah đăp- nàng dơ̆ tam lơh mờ bol sò tơm thàm phà dà lơgar he neh rlau ờ gam tai là bơtô jrô kơryan đah ală cau kòn geh bal dùl mhàm bal Lạc Hồng.

Tàm gùng lòt bơtàu tơngguh hơ̆, broă lơh dong kờl tơrgùm bal jơi bơtiàn sùm geh Đảng mờ Dà lơgar gĭt nền là săc rwah dờng màng jŏ jòng, là broă kwơmàng tàm mpồl tam klăc dờng jơh gùt jơi bơtiàn. Bol he gĭt loh ală jơnau bơh tài jơnau kah yau gơlam tus tam lơh mờ bol sò tơm thàm phà dà lơgar hê- bơh bơta ƀư tê, tam cah is đah bơdìh tus dì ală jơnau jòi kai kờñ lơh tơn roh nùs nhơm tam klăc, lơh rơsìh nùs nhơm gơjrañ kơ wềng tài jơnau jòi kai cíñ trị. Mơya bol he kung gĭt sơl là: tơl nă cau Việt Nam, bulah ơm tàm lơgar halà bơdìh lơgar, bulah ơm tàm đah lơi bơh jơnau kah yau dê, ndrờm cèng bal dùl mò pàng, dùl nùs gơboh lời ai ƀòn tờm in, dà lơgar in.

Tơrgùm dùl jơi bơtiàn ờ gŏ di là hŭi tĕ jơnau kah yau halà jùt sang jơh bơta krơi is mờ là dờn dờp ală jơnau sền sơnơng krơi is tàm nùs nhơm toh glài mờ ki ngàm, nàng wèt sền bal tus jơnau kờñ dờng rlau tai: bơ̆t bơtàu dùl lơgar Việt Nam ring lơngai, tơrgùm dùl, pas pràn, jak chài, bơtàu tơngguh nàng ală rơnàng tơnơ̆ do in ờ tŭ lơi pal sền gŏ tam lơh mờ bol sò tơm thàm phà dà lơgar, tam cah is mờ gơjrañ kơ wềng, roh rui hoàc hươr bè bèp ồng he dê neh pal kong.

Bol he ờ gơtùi cih wơl jơnau kah yau mơya bol he gơtùi rơndăp wơl tơnơ̆ do. Jơnau neh rlau là nàng prăp kah, nàng kah rơngal mờ nàng ai jơnau bơsram. Rài tơnơ̆ dp là nàng bal mờ gơ̆p bơ̆t bơtàu kơlôi lơh mờ bơtàu tơngguh.

Rlau mờ cau lơi jơh, rơnàng ngai do gĭt loh là lơngăp lơngai is mờ tơrgùm dùl ờ di là jơnau kờñ dŭt ndơl mờ là anih sơnđờm ai dùl gùng lòt pa in: gùng lòt bơ̆t bơtàu dùl lơgar Việt Nam ring lơngai, pas pràn, jak chài, bơtàu tơngguh mờ gam sùm. Dilah bè rơnàng bèp bi neh cih kah jơnau song “Lơgar Việt Nam là dùl, jơi bơtiàn Việt Nam là dùl” bơh ală phi să roh rui, den rơnàng ngai do pal tam gơl jơnau niam hơ̆ gơgơs bơta gơn kơnờm bơtàu tơngguh, gơgơs bàr nơm nđar brồ guh tàm rài pa.

Rlau mờ tŭ lơi jơh, bol he pal bơ̆t bơtàu dùl rài lơh sa pơnđơl pràn is, kơnờm tàm bơta pràn is; dùl rài sền gàr dà lơgar- lơngăp lơngai jơh gùt làng bol, tơl làm mờ pa; dùl anih lơh broă cíñ trị tơrmù dipal, lơh broă gơtùi, geh cồng nha, dùl mpồl bơtiàn bơtàu tơngguh, tam klăc, niam chài mờ niam chài kòn bơnus.

Rài pa mờ bol he gam cơnđoà tus- bal mờ măy mŏk bồ tơngoh jak kòn bơnus lơh is, tam gơl sồ, lơh sa tơlir mờ bơtàu tơngguh kơ̆ kơl jăp- gơ sồr pal geh bơta kơlôi sơnơng pa, broă lơh tơrlòng lài bơtàu tơngguh pa, kòn bơnus pa. Tềng đăp măt, bol he gam uă bơta lòng bè adăt boh lam, cồng nha lơh broă, bơta niam mpồl lơh broă, lơngăp lơngai tiah ơm kis, kòp bơtờp, tam gơl nhơm trồ tiah mờ geh bal ală jơnau digơlan pơhìn lơngăp lơngai ờ geh bơh lài. Mơya jơnau kah yau neh tơnggŏ loh: jơi bơtiàn Việt Nam ờ hềt tŭ lơi rŭc jơng dơrcul nùs tềng đăp bòl glar, kal ke, bơta lòng. Broă là bol he geh tơl nùs nhơm khin cha nàng tam gơl, bơta nùs nhơm kơ̆p kờñ ngan nàng brồ guh, mờ tơl tam klăc nàng tam gơl kal ke gơgơs gơn kơnờm bơtàu tơngguh halà ờ.

Sền hờ đah đăp, bol he geh lơm gơnoar pơñiờ să pin dờn tàm bơta pràn dơlam is jơi bơtiàn Việt Nam dê- dùl jơi bơtiàn neh gĭt nđờ dơ̆ tam lơh jai pha mờ bol sò tơm thàm phà lơgar he mờ ñă ntàu bơh tam lơh mờ tam lơh mờ cau sò tơm thàm phà dà lơgar he, đơs nền he tềng đăp jơnau kah yau mờ tềng đăp dunia. Mờ bơhiàn ờs mờng bơh yau rbô năm bơ̆t bơtàu lơgar mờ gàr lơgar, mờ bơta kơ̆p kờñ sùm brồ guh sùm, mờ rơnàng kơnòm să jak chài, kơ̆p kờñ dờng, gơboh lơgar, bơceh lơh mờ bềng nùs nhơm khin cha kơ̆ dơn- Việt Nam ngan ngồn rơ̆p lơh geh cồng nha.

Rài XXI là rài bơh ală jơi bơtiàn gĭt lơh tờm tŭ tơngai rài kis he dê. Mờ jơi bơtiàn Việt Nam- mờ jơh ală jơnau bơsram bơh jơnau neh rlau, mờ jơh ală bơta tam klăc ngai do, ngan ngồn rơ̆p cih tai ală tăp pa gơglŏ gơcrà tàm gùng lòt bơtàu tơngguh bơh he dê. Tài dùl lơgar Việt Nam lơngăp lơngai is, khăt gơboh is, chờ hờp, pas pràn, jak chài, gam sùm, geh bơngă mờ jơnau đơs kwơmàng tàm mpồl bơtiàn ală lơgar.