Jăt gah gùng rơndeh lòt mhar, ală cau lơh broă bal mờ cau chài gam lơh broă ờ ơm rơlô: bơh tuh bê tông, lơh rơbàng tàm gùng tus mờ broă lơh gơs tơl ală bơta broă dềt ngan. Săp ntas măi mok gam mpong sùm. Ală rơndeh pơn diang phan tàm tơrbŏ bal pơn diang phan lơh broă. Bi Lê Văn Huynh, cau lơh broă gam lơh broă tàm gơl gùng TL10 pà git: “Oh mi lơh broă lơh ngan jơh pràn. Gam lơh ngan lơh broă, bŭ lah Satềp mơya oh mi kung gam lik lơh broă sơl. Mờ nùs nhơm jơh ală oh mi ndrờm chờ hờp lơh ngan lơh broă, mờ jơnau kờñ nàng lơh gơs di mờ tơngai neh geh ai”.

Kung ndrờm bal mờ nùs nhơm do sơl, bi Phan Viết Trí, atbồ mpồl lơh broă tềng gơl gùng TL10 pà git, mpồl lơh broă bơh bi dê geh 30 nă cau, ngai Satềp Tây, jơh ală cau tàm mpồl kung gam lơh broă bè ờs sơl. “Tŭ do oh mi gam lơh ngan ai jơh bơta pràn nàng lơh ngan ai broă lơh gùng geh lơh gơs di mờ jơnau neh geh ai. Bŭ lah trồ tiah gơtìp bal kal ke, mơya oh mi kung gam lơh ngan nàng lơh broă, trồ mìu kung lơh broă sơl. Satềp Tây oh mi kung gam lơh broă bè ờs sơl”.

Gùng brong koèl kơh Phượng Hoàng là gùng brong mŭt mìng geh dùl lơm tàm gùng rơndeh lòt mhar Khánh Hoà – Buôn Ma Thuột dê. Tŭ do cau bơcri priă gam ai uă ngan cau lơh broă, phan lơh broă, măi mok nàng lơh broă “ngai kung bè mang” nàng lơh gơs gùng brong ai rơndeh lòt di tàm lồi nam 2025 do. Tềng tiah lơh broă đah bàr gùng brong koèl kơh Phượng Hoàng đah càr Dăk Lăk, git nđờ jơ̆t nă cau lơh broă bal mờ ală rơndeh, măi mok gam lơh bơrtoh mền nàng lơh tơrlah lŭ, chŏ pơn diang ù, lŭ lik bơdìh tiah lơh broă, cang jàl, tơn tào lòs, ƀồm bê tông mờ tồt ală ñjrong lơh kơl jăp gùng brong. Ồng Cao Tấn Lực, Phó Kwang đơng lam lơh gùng brong Phượng Hoàng pà git: “Kông ty neh ai gùng dà broă lơh “ngai kung bè mang, geh sùm lơh broă nàng ai sùm broă khoàng gùng brong geh lơh broă. Broă tờ bol añ dê đah gùng brong hờ đah măt tơngai mŭt đah ma càr Dăk Lăk dê neh tờ jòng 400 thơ̆k, đah kiao den neh tờ rơlao 440 thơ̆k”.

Ồng Ngô Hiểu Khoa, Kwang lam bồ Mpồl đơng lam lơh Tập đoàn Đèo Cả pà git, gùng brong Phượng Hoàng jòng 1 kơi sồ 700 thơ̆k, là dùl broă lơh tàm khà broă geh bơta jòng 11 kơi sồ geh mpồl dờp lơh. Tŭ do pah ngai tập đoàn ai mờr 400 nă cau lơh broă mờ geh di pơgăp 100 nơm rơndeh bal mờ măi mok lơh broă sùm nàng lơh gùng trồm bal mờ 10 rơbàng mờ gùng gơwèt broă geh dờp lơh. Di lah broă tơm ntrờn ù tiah đah bàr Khánh Hoà geh bơsong ring niam, broă ai rơndeh lòt tàm gùng brong di lồi nam 2025 là geh ngan. Ồng Ngô Hiểu Khoa đơs: “Nam 2025, bol añ lơh ngan lơh gơs ală ñjrong, tờm, bơtơ̆t mờ dra rơbàng. Mìng is bè gùng brong Phượng Hoàng gam tìp ờ uă kal ke tàm broă tơm ntrờn ù tiahtàm đah măt tơngai lik càr Khánh Hoà, mờ di lah gơtùi pờ mpồng gùng brong lài mờ Satềp tây nam 2025 do mờ bơta tàm ù ndrờm niam bè tàm do den di gơlan tus lồi nam 2025 bol añ rơ̆p lơh di mờ tơngai geh ai rơndeh lòt tàm gùng brong Phượng Hoàng”.

Rơndăp broă gùng rơndeh lòt mhar Khánh Hoà – Buôn Ma Thuột kờp jơh bơta jờng 116,5 kơi sồ, tàm hơ̆ bơnah uă ngan tàm rơndăp broă lơh gùng do lòt gan càr Dăk Lăk. Is ồn, rơndăp broă bơnah 3 neh lơh gơs broă tơm ntrờn ù tiah mờ geh khà broă lơh mờr 32%. Bŭ lah gơtìp kal ke bè trồ tiah, mờ 18 ngai trồ mìu tàm nhai 12, mơya kơnờm mờ broă lơh ngan bal mờ nùs nhơm ờ ngòt kal ke bơh cau lơh broă dê, broă lơh gùng kung gam geh lơh sùm. Ồng Đặng Thọ Dần, Kwang lam bồ đơng lam lơh rơndăp broă lơh do pà git: “Tŭ do tàm gơl gùng do geh mờr 1 rơbô nă cau lơh broă gam lơh ngan lơh broă, trồ mìu kung lơh broă sơl, 500 nơm rơndeh mờ 49 tiah lơh broă tờm tàm jơh gơl gùng. Bol añ sùm lam sồr ală mpồl lơh broă pal lơh jăt adăt boh lam lơh broă, cau lơh broă pal geh dờp priă nhai, pal gàr niam gơnoar kwơ cau lơh broă in”.

Mờ jơnau kờñ tus lồi nam 2025 lơh gơs 68 kơi sồ sơnrờp ngan tàm Rơndăp broă lơh gùng rơndeh lòt mhar Khánh Hoà – Buôn Ma Thuột, ală mpồl lơh broă gơrềng bal neh mờ gam lơh ndrờm bal ală gùng dà broă lơh nàng lơh mhar broă lơh, tơrmù ờ jŏ tơngai lơh gùng. Ală ngai bồ nam pa 2025, git nđờ rơbô nă cau lơh broă tàm gơl gùng. Ală cau do là ală cau lơh mhar broă lơh gơs gơl gùng rơndeh ntoăt mhar, pơgồp bal tàm broă nàng Tây Nguyên đơs bal, càr Dăk Lăk đơs is geh tai bơta pràn nàng tơnguh tàm rài brồ să.