Ngai òr (21/02), tàm ƀòn dờng Hồ Chí Minh, Anih duh broă Làng bol càr Dăk Lăk neh bơyai lơh dơ̆ pơrjum ƀăo yal bè Lơh chờ kơphe Buôn Ma Thuột dơ̆ 9 nam 2025, mờ tơngu me “Buôn Ma Thuột Tiah tus bơh kơphe dunia dê”. Geh lơh tàm 5 ngai, bơh ngai 09 tus ngai 13 nhai 3, lơh Chờ kơphe Buôn Ma Thuột dơ̆ 9 nam 2025 geh uă bơta pa pơnrờm mờ ală dơ̆ bơyai lơh lài, kờp dŭ gơ hòi gơ jà rơlao 200 rơbô nă cau năc tus bal. Uă broă lơh tàm lơh Chờ geh kơ̆p kờñ là bơta pràn pa ai gơguh lơh sa càr Dăk Lăk in.

Bơh 8 dơ̆ bơyai lơh, lơh Chờ kơphe Buôn Ma Thuột neh gơs dùl broă lơh pơnrơ ngan bơh gah lơh kơphe lơgar Việt Nam dê, geh gơrềng niam uă ngan, lời wơl bơta niam bơnĕ tus mờ làng bol, cau năc tàm lơgar mờ ală lơgar. Broă lơh dơ̆ do kung là dùl tàm ală broă lơh mùl màl chờ gờm tơnkah 50 nam Ngai tam lơh pha lin Buôn Ma Thuột, tơnklàs càr Dăk Lăk (10/3/1975 - 10/3/2025).

Lơh Chờ kơphe nam do rơ̆p geh 17 broă lơh tờm geh pơnrơ ngan bè: Ràng tơlik mìng dùl gah lơh kơphe mờ phan OCOP; dơ̆ pơrlòng coh kơphe bơkah; pơrjum tìp bal kă bro phan mờ ală lơgar-tơrbŏ bal, tơnguh bơta niam kơphe Việt Nam dê; hùc dà kơphe ờ sa priă tàm ală hìu tăc dà kơphe tàm gùt càr; Lơh pơrlòng was plung tàm kơnhoàl Lăk; Lơh chờ rơwas Buôn Đôn…

Ồng Trần Hồng Tiến, Kwang lam bồ Sờh Niam chài, Tàp pràn să jan mờ Lòt nhơl càr Dăk Lăk pà git, kờp dŭ Lơh chờ kơphe nam do rơ̆p gơ hòi gơ jà rơlao 200 rơbô nă cau năc tus. Bơdìh mờ broă lơh bè kơphe, cau năc tus mờ dơ̆ Lơh chờ gam geh tus bal mờ phan lời wơl càr Dăk Lăk dê.