Do là dơ̆ lòt còp kâp Dà lơgar sơn rờp tus lơgar Nga bơh Cau lam bồ Đảng, Dà lơgar he dê kờp bơh nam 1991, geh lơh tơnơ̆ Pơrjum dờng dơ̆ XIV Đảng dê mờ dơ̆ tĕ khà Quốc hội khoă XVI. Nam 2025, priă lơh geh bơh kă bro phan đah Việt Nam mờ Nga geh mờr 4 tơmàn 800 tơlak dolar Mỹ; 5 nhai bồ nam do geh 2 tơmàn 160 tơlak dolar Mỹ, gơguh 6,4% pơndrờm dùl tŭ bal mờ nam lài.

Kờp tus nhai 7, Nga geh 223 rơndap broă lơh bơcri priă tàm Việt Nam, kờp jơh priă bơcri mờr 1 tơmàn dolar Mỹ; Việt Nam geh 19 rơndap broă lơh tàm lơgar Nga, kờp jơh priă bơcri cih tàm sră 1 tơmàn 640 tơlak dolar Mỹ. Bàr lơgar gam lơh pràn lơh broă bal tàm ală gah ling klàng - lơngăp lơngai, năng lượng, jak chài - măi mok, bơto bơsram, niam chài mờ lòt nhơl; tàm hơ̆ geh rơndap broă lơh Anih tờm kơlôi sơnơng jak chài mờ măi mok hạt nhân. Dơ̆ lòt còp pơgồp bơnah lơh mùl màl gùng dà lơh broă mờ lơgar ndai krơi is, lơh tờm is, lơh uă gah, lơh li la Việt Nam dê, tài bơta kuơ làng bol 2 lơgar, tài ring lơngai mờ bơtàu tơnguh. Dơ̆ lòt còp geh kơp gơn lơh gơlik tŭ tơngai pa, chồl tơnguh bơta git gơp Lơh broă bal jŏ jòng tơl làm đah Việt Nam mờ Nga bơtàu tơnguh pràn kơldang, mùl màl mờ kơ̆ kơljap jŏ jòng sùm, mờ kung lơh niam rlau tai bơta pin dờn kuơmàng mờ bơta git gơp lơh bơyô ờs mờng đah 2 lơgar.