Jat Mpồl atbồ rơndăp broă lơh bơcri priă lơh broă lơh drơng broă làng bol mờ lơh sa mờ măi mok càr Dăk Lăk, 3 rơndăp broă lơh tàm ală sàh Buôn Đôn, Ia Rvê mờ Ia Lốp ndrờm neh lơh sir rlau 80% mpồl broă. Ală cau bơcri priă lơh gam tơrgùm lơh sir bơnah lơh crăp, crăp ală măi mok, phan bơna mờ pơn đơl pràn lơh ngan lơh sir lài mờ ngai 6/8 do. Nàng gàr niam tŭ tơngai mut lơh, Mpồl Atbồ rơndăp broă lơh lam lơh dơ̆ mut lơh uă “70 ngai mang lơh sùm, ờ ơm rlô”, ai kwang bàng jat sền tiah lơh broă; Gah đơng lam ling klàng càr Dăk Lăk kung ai mpồl ling tus dong kờl mut lơh tơn. Bal mờ hơ̆, Mpồl atbồ rơndăp broă lơh gam lơh sir sră nggal bơcri priă lơh Hìu bơsram ơm sa bĭc tơn tàm hìu bơsram sàh Ea Bung. Ồng Võ Văn Lợi, Phó Kwang lam bồ Mpồl atbồ rơndăp broă lơh bơcri priă lơh broă lơh drơng broă làng bol mờ lơh sa mờ măi mok càr Dăk Lăk, pà gĭt:

“Gơwèt mờ jơh ală mpồl lơh broă, neh sơr lèt gan kal ke bè cau lơh broă, kal ke bè trồ tiah, kal ke bè jun pơndiang nàng lơh geh tŭ tơngai mut lơh bal. Tŭ do, sền bal 3 hìu bơsram ndrờm neh lơh sir rlau 80% mpồl ală broă. Mờ tŭ tơngai mut lơh do den rơ̆p geh bàr pe bơta ngai 15 nhai 7 rơ̆p lơh sir jơh ală bơta, geh bal crăp ală phan bơna bơto bơtê. Gàr niam tŭ tơngai mut lơh jat jơnau sồr bơh Bộ Chính trị kung bè Tỉñ ủy càr, Mpồl duh broă Làng bol mờ Anih duh broă Làng bol càr dê”.

Càr Lâm Đồng kung gam lam lơh bơt bơtàu 5 hìu bơsram ơm sa bĭc tơn tàm hìu bơsram tàm ală sàh tiah nhàr lơgar, geh Quảng Trực, Thuận An, Tuy Đức, Thuận Hạnh mờ Dăk Wil, mờ kờp jơh khà priă bơcri lơh rlau 1 rơbô 140 tơmàn đong. Ală tiah gam jơh nùs lơh ngan lơh sir ală rơndăp broă lơh di halà gờñ rlau mờ broă rơndăp lơh, gàr niam phan bơna drơng broă bơto bơtê mờ bơsram bơh tàm bồ nam bơsram pa tơn.

Tàm hơ̆, 2 rơndăp broă lơh Hìu bơsram ơm sa bĭc tơn tàm ală sàh tiah nhàr lơgar Quảng Trực mờ Thuận An gam geh lơh mhar tŭ tơngai mut lơh. Tus tŭ do, bơnah lồi dŭt bơh broă lơh bơt bơtàu dê sền bal neh lơh sir; ală cau bơcri priă lơh ai tai mpồl cau lơh broă, phan bơna măi mok, mpồl cau tơnguh tŭ lơh broă, tơnguh mpồl lơh broă nàng lơh sir lài mờ ngai 15/8 do, gờñ rlau 15 ngai pơndrờm mờ broă rơndăp lơh dê. Mò Lê Thị Bích Liên, Kwang lam bồ Sờh Bơto bơtê mờ Bơsram càr Lâm Đồng, pà gĭt:

“Sờh Bơto bơtê neh lơh broă tơn mờ sàh uă dơ̆ ngan mờ neh ring bal mờ sàh gùng dà broă lơh tam pà kơnòm bơsram mờ Sờh neh lơh sir jơh gùng dà broă lơh rơndăp kơnòm bơsram. Bè cau pơgru den Sờh Bơto bơtê neh tă pơgồp bal jơnau đơs jơh lơm bè broă tam pà cau lơh broă bơh tiah bơh Bình Thuận mờ Lâm Đồng bơtơl ai 2 hìu bơsram tiah nhàr lơgar in”.

Broă mhar lơh sir ală hìu bơsram ơm sa bĭc tơn tàm ală sàh tiah nhàr lơgar tàm tiah Tây Nguyên ờ mìng lơh geh jơnau sồr tềng đăp mat bè phan bơna ai nam bơsram in lơm mờ gam tơngŏ bơta sền gròi bơh Đảng mờ Dà lơgar dê gơwèt mờ broă lơh bơto bơtê tiah nhàr lơgar dê.