Tàm dơ̆ tìp măt kâp dờng, ồng Trần Thanh Mẫn, Chủ tịch Quốc hội đơs nền lơgar Việt Nam lài kung bè tơnơ̆ sền kwơ bơta git gơ̆p mờ lơgar Hàn Quốc, kơ̆p kờñ lơh broă bal bàr lơgar pơn jăt tai bơtàu tơnguh mùl màl, geh cồng nha, kơl jăp, di pal mờ broă Tam klăc bal kwơ màng tơl làm dê.

Bè gùng dà broă lơh bal tàm tơngai tus, bàr gah ring bal pơn jăt tai tơnguh nùs nhơm pin dờn chính trị; tơnguh broă lơh broă bal mùl màl tàm ală gah broă sền gàr dà lơgar, lơngăp lơngai, cri bơyai broă mờ lơgar ndai; lơh pràn lơh broă bal lơh sa, kă bro phan, bơcri priă, wèt tus jơnau kờñ gơguh khà priă kă bro phan đah bàr lơgar tus 100 tơmàn Dolar Mỹ tàm nam 2026 mờ 150 tơmàn Dolar Mỹ tàm nam 2030 jăt gùng dà broă lơh ndrờm bal, mùl màl; lơh pràn lơh broă bal gah jăk chài, măi mok mờ ai tơl bơta niam nàng lơgar Việt Nam tus bal ală rơndăp broă lơh dờng bè bán dẫn, AI lơgar Hàn Quốc dê.