Gùng càr 1 Dăk Nông, gơl lòt gan thôn 3, sàh Quảng Tâm, kơnhoàl Tuy Đức geh uă anih tơrlah jrô ngan mờ ơnàng tus bàr pe thơk tơn, gơ jrô nggùl kong rơndeh tơn. Tàm uă gơl gùng, cài măt gùng neh gơplok jơh, mpờl lŭ sòñ sồt ngan. Pah tŭ rơndeh lòt rê, thul kơm buh gơpar klam jơngo jơh lơh làng bol 2 gah gùng pal ndơl muh ờ tă nhơm. Ồng Trương Anh Bằng, cau tờm dùl hìu ràng tăc phan ñô sa tàm Quảng Tâm pà gĭt, gùng ờ diơng neh uă nam. Bulah pah nam kung geh lơh niam wơl sơl mơya mìng tơnơ̆ dùl tŭ tơngai ờ jŏ lơm gùng gơtìp ờ diơng wơl tai.

“Hìu añ tăc phan sa tàm do sùm pal til mpồng krơh tùh nàng ờ ai thul kơmbuh in gơ mŭt tàm phan sa. Kơƀàng cơ ghế pal jùt bơh 2 tus 3 dơ̆ pah ngai mơya kung gam ờ sàng goh sơl. Uă mè bèp kơnòm bơsram pơndiang kòn lòt gan gùng do gơtìp gơpừ ƀơ̆ ƀơl jơh àu mpha. Ală sau lòt bơsram gơtìp gơpừ să bồ bŏ bil lơm, añ pal rơcăng thùng dà nàng ală sau mờ mè bèp ală sau dê in dan ràu jơng tê. Khi geh lơh niam wơl mơya gùng kung gam ờ diơng, kung gam bŏ bil thul kơmbuh lơm sơl”.

Gùng càr 1 tàm Dăk Nông ờ diơng ờ mìng lơh gơrềng tus broă kă bro mờ ơm kis làng bol dê mờ gam lơh rơndeh rơndồ mhar ờ diơng, tơngai jun pơndiang phan kă bro jŏ rlau mờ roh uă xăng zờu, lơh gơguh priă tă lòt rê jun pơndiang. Bi Nguyễn Kim Toàn, dùl nă cau măy rơndeh kông gua, kờp dŭ: “Añ lòt bơh Quảng Tâm mŭt tàm Dăk R’tih halà bàr pe sàh ndai tàm dơlam tŭ do tŭ jiơ gơguh tus 2, 3 dơ̆ pơndrờm mờ lài. Tŭ lài, añ mìng kờñ tuh bơh 3 tus 4 lĭt zờu gời lơm mơya tŭ do pal tuh bơh 9 tus 10 lit zờu. Lài do, lòt gùng niam, tam gơl kong rơndeh mìng pơgăp 1 nam nggùl dùl dơ̆ mơya tŭ do pal tam gơl kong pa mìng pơgăp 7 tus 8 nhai lơm”.

Gùng càr 1 là gơl gùng tờm ngan, tơrbŏ kơnhoàl Tuy Đức mờ kơnhoàl Dăk R’lấp, tàm tơrbŏ mờ gùng Hồ Chí Minh mờ Gùng dà lơgar 14C, bal mờ mpồng nhàr lơgar Bu Prăng lòt lơgar Campuchia, geh gơnoar broă kwơmàng tàm lòt rê jun pơndiang phan bơna kă bro, ai tơl bơta bơtàu tơngguh lơh sa – mpồl bơtiàn, mờ gàr niam lơngăp lơngai sền gàr dà lơgar tiah nhàr lơgar Tuy Đức. Jơnau bơh tài gơbàn ờ diơng bơh gơl gùng dê là tài khà lòt rê rơndeh kông gua dờng, rơndeh năc gơguh pràn tàm ală nam do, tàm tŭ broă lơh sền gàr, lơh niam wơl pah nam ờ huan lơh. Tŭ do jơnau dan neh geh sền swì ring bal mờ gam ơm kơ̆p bơsong ală sră pơ àr pơn jăt tai.

“Càr neh kơlôi sơnơng jun jàu bàr pe bơnah priă bơh Dà lơgar nàng lam lơh gơl gùng do. Bè jơnau sồr mờ priă jền, ală sră nggal gam geh lơh nàng digơlan gơtùi sơnđờm lơh ơnàng gùng tàm lồi nam do”.