Càr Dăk Lăk neh wă rlau 5 tơlak 330 rơbô dơ̆ năc, lơh geh rlau 56% broă rơndăp lơh nam, gơguh rlau 37% pơndrờm dùl tŭ bal mờ nam lài. Kờp jơh priă lơh geh bơh lòt nhơl kờp dŭ geh 9 rơbô 600 tơmàn đong, gơguh mờr 38% pơndrờm dùl tŭ bal. Càr Dăk Lăk neh lơh sir sră nggal dan mờ UNESCO cih mat “Bơta gĭt wă tam mờ lơh gơlik kơphê”, lơh sră nggal phan lời wơl “Dơ̆ lơh Yàng duh khoai dà mbòr kòn cau Rơđê dê”, mơkung ai lơh jat broă lơh dong kờl sền gàr mờ ngui niam bơta kwơ phan lời wơl niam chài cing mồng tơngai bơh nam 2026-2030.

Tŭ do càr gam tơrgùm lam lơh ală tơngume Ală jơnau neh lơh nền bơtàu tơnguh lòt nhơl tơngai bơh nam 2026-2030, rcang bơyai lơh Dơ̆ lơh chờ Sầu riêng Dăk Lăk nam 2026, mơkung lơh pràn bơtàu tơnguh phan bơna lòt nhơl pa, tam gơl sồ, bơt bơtàu măt kă bro lòt nhơl mờ tơnguh bơta chài mpồl lơh broă dê nàng kờñ pơgồp bơnah lơh jat jơnau kờñ gơguh tai lơh sa 2 nơm khà.

 Lơh jăt nam Lòt nhơl Dà lơgar 2026 mờ tơngume “Brê bơnơm dờng tìp dà lềng tơlir”, tàm 6 nhai do, jơh gùt càr Gia Lai wă pơgăp 8 tơlak 750 rbô nă năc, gơguh 19% pơndrờm bal dồ tŭ mờ nam lài. Kờp jơh priă geh bơh năc lòt nhơl geh 19 rbô tơmàn đong. Pal sền ngăc, khà năc ală lơgar gơguh tus 80%, yal wơl cồng nha bơh ală broă lơh hòi jà, yal uă tàm uă drà bè Hàn Quốc, Philippines mờ Australia. Uă anih tus tàm càr pơn jăt tai geh ală lơgar cih dờp, tàm hơ̆ Quy Nhơn geh pang ƀăo lòt nhơl Lonely Planet săc rwah mŭt tàm Mpồl 25 anih tus gơkờñ ngan rlau jơh lời ai năc lòt nhơl dà lềng in nam 2026.

Tàm bơta pràn gơguh tai do, Gia Lai geh jơnau kờñ tus nam 2030 wă 18 tơlak 500 rbô nă năc, priă geh bơh kă bro lòt nhơl geh pơgăp 35 rbô tơmàn đong pah nam. Nàng lơh geh ngan ngồn jơnau kờñ do, càr gam tơrgùm gơhòi gơ jà ală cau bơcri priă uă lam lơh ală rơndăp broă lơh lòt nhơl geh lơh dờng; mơkung lơh jăt jơnau đơs “pe bañ: bañ rồn bơklơn, bañ tơnguh giă, bañ sơrbì sồ siă- 3 pal: pal niam lơngăp lơngai, pal jơh nùs, pal lời wơl bơta kah niam”, hòi jà tơl nă làng bol gơgơs dồ nă “cau ala măt lòt nhơl”, geh: bañ rồn bơklơn, bañ tơnguh giă, bañ sơrbì sồ siă mờ pal niam lơngăp lơngai, pal jơh nùs, pal lời wơl bơta kah niam.