Di Satềp nam pa nam Ơseh 2026 (bơh ngai 27 nhai 12 nam he tus nam 6 Satềp), càr Lâm Đồng dờp geh khà cua năc lòt nhơl gơguh uă. Jăt Anih duh broă Làng bol càr Lâm Đồng yal, kờp jơh khà cau năc lòt nhơl, ơm rơlô să geh di pơgăp 925 rơbô dơ̆, gơguh 32% pơn drờm mờ Satềp nam Bơs 2025 lài do; tàm hơ̆ cau năc tus bơh ală lơgar kờp dŭ geh 62 rơbô dơ̆. Kờp jơh priă geh bơh broă lòt nhơl di pơgăp 1 rơbô 850 tơmàn đong.

Cau năc tơrgùm gal bơh ngai 2 Satềp tus ngai 4 Satềp; uă hìu ơm tàm Dà Làc, Phan Thiết mờ Mũi Né geh bơta pràn uă ngan. Bơta pràn ngui jơdŭ ơm geh gùt càr bơh 80 tus 685%, ai gŏ bơta gơhòi gơjà lòt nhơl pơn jăt tai gơguh pràn, ai geh bơta ƀuơn broă gơguh lơh sa bơh gah do dê tàm nam 2026.

Lòt nhơl Khánh Hòa bồ nam pa mờ ală tềl tơnggŏ gơguh niam ngan tŭ khà nac lòt nhơl gơguh uă, uă anih ơm wơl bic mang neh geh ơpah jơh, kờp jơh priă lơh geh tàm dơ̆ sa tềp nam ơseh 2026 geh mờr 2 rbô 200 tơmàn đong, gơguh rlau 62% pơndrờm dùl tŭ bal mờ nam lài. Bơh ngai 29 nhai 12 nam bơs tus ngai 5 sa tềp, ƀlàng rơndeh par ală lơgar Cam Ranh drơng mờr 800 dơ̆ par mờ rlau 140 rbô dơ̆ nac, bal mờ hơ̆ là khà uă ngan nac lòt nhơl mờ gùng ù gờl. Broă lòt nhơl sơnam pa geh lơh duh hồl ngan tàm ală anih lòt sền, ù tiah niam tiơng pơn rơ.

Jơh gùt càr wă mờr 320 rbô dơ̆ nac ơm wơl bic mang, gơguh rlau 12%; tàm hơ̆ nac ală lơgar geh mờr 120 rbô dơ̆, gơguh rlau 23%. Do là bơnàng jă ƀuơn ngan nàng càr in pơn jat tai bơtàu tơnguh lòt nhơl, wèt tus jơnau kờñ lơh geh 77 rbô tơmàn đong tàm nam 2026.

Jăt Sờh Niam chài Tàp pràn să jan mờ Lòt nhơl càr Dăk Lăk yal, tàm 6 ngai Satềp (bơh ngai 27 tus ngai 22 nhai 2), gùt càr wă gẻh di pơgăp 395 rơbô dơ̆ cau năc lòt nhơl, kờp jơh priă geh bơh broă lòt nhơl kờp dŭ geh 457 tơmàn đong. Di lah pơn drờm mờ Satềp nam Bơs, khà cau năc lòt nhơl gơguh 33% mờ priă geh gơguh 25%. Ală tiah, anih lòt nhơl brê bơnơm mờ niam chài mpồl bơtiàn tàm tiah đah măt tơngai Mŭt càr pơn jăt tai là anih tus niam bơnĕ ngan, tàm tŭ tiah đah măt tơngai Lik geh uă mờ lòt nhơl dà lềng mờ lòt nhơl sền ù tiah niam. Uă broă lơh niam chài, tàp pràn să jan bồ nam pa geh bơyai lơh bè pơrlòng was plung cau klao sàh Krông Ana, lơh chờ pơrlòng was plung tơnao dà Suối Bùn, sàh Sơn Hoà mờ ală broă lơh chờ kờp dŭ geh bơyai lơh tàm tơngai tus. Cồng nha niam do ai tơngŏ bơta gơhòi gơjà ngai sơlơ loh làng ngan bơh broă lòt nhơl càr dê pơgồp bal mờ bơta niam chài mờ lòt sền mpồl bơtiàn ƀòn lơgar.