Tàm thôn Dăk Snao, sàh Quảng Sơn, tiah geh jơnau pơhìn gơtìp tơrlah ù ơnàng rlau 4 lồ, lơh gơ rềng tus 79 hìu bơnhă mờ 454 nă cau. Jơh 79 hìu bơnhă geh gơnoar atbồ ƀòn lơgar ntrờn tus tiah lơngap lơngai. Anih duh broă Làng bol càr Lâm Đồng yal bơta jal mhar bè trồ tiah lơh aniai tàm tiah do.

Tàm sàh D’ran, dà croh Cát hòi ñhăng ngan, lơh gơbàn tơrlah dờng ngan jơng, jrong đơng rbàng bê tông tàm ƀòn Ga, thôn Phú Thuận, lơh 8 hìu bơnhă mờ 35 nă cau gơtìp dà wềl. Gơnoar atbồ ƀòn lơgar neh sồr mpồl lơh broă, ai phan bơna, măi mok tus bơsong bơta tơrlah, pờ gùng ing, ntrờn làng bol lik bơh tiah ngòt rơngơt mờ lam lơh ơm gak, tơngkah lài. Tàm tŭ hơ̆, pơn jat sùm tàm 2 mho ngai 19 mờ ngai 20/9, ù, lŭ bơh taluy hơđang kuèl Prenn, sơnah ƀòn Xuân Hương - Dà Làc gơ dùh tàm gùng.

Mpồl lơh broă geh gơnoar neh sơrbac mhar tus nàng tam pà gùng lòt, ai phan bơna, măi mok khòm tơrgùm ù lŭ, gàr lơngăp lơngai ai cau mờ rơndeh rơndồ lòt rê in. Tềng đap broă gơlik geh kal ke trồ tiah lơh aniai dê, Anih duh broă Làng bol càr Lâm Đồng sồr ală ƀòn lơgar đal git tiah ngòt rơngơt, ai cau ơm gàr, ntrờn làng bol mờ gàr tơl phan ngui sa pal geh.