Tàm pơrjum, Mpồl duh broă làng bol càr neh ring bal ală tơngu me gơwèt gơnoar broă, tàm hơ̆ geh: gùng dà rơndăp tăp sèng mpồl lơh broă sră nggal kấp càr mờ kấp sàh; tơn jơh gơnoar broă Củ tịc Anih duh broă làng bol càr gơwèt mờ ồng Phạm Ngọc Nghị.

Bơdìh hơ̆ tai, Mpồl duh broă làng bol càr kung cri bơyai ală jơnau lơh nền tàm pơrjum bè kes priă, bơcri priă dà lơgar, tam gơl jơnau kờñ ngui ù brê nàng drơng broă lơh gùng rơndeh lòt mhar Khánh Hoà – Buôn ma Thuột, mờ ală broă dong kờl tơn jơh hìu sèt, hìu ồm ñhăt dà mìu di jăt jơnau sồr bơh Thủ tướng Cíñ phủ dê. Mò Huỳnh Thị Chiến Hoà, Củ tịc Mpồl duh broă làng bol càr đơs tờm, pơrjum geh uă tơngu me jal mhar, gơrềng uă ngan tus mờ mpồl lơh broă sră nggal bal mờ nùs nhơm kwang bàng, làng bol. Mò sồr ală cau ala măt đòm jăt nùs nhơm lơh tờm, geh kơnòl nàng lơh geh cồng nha, di mờ jơnau kơ̆p kờñ bơh cau tĕ khà dê.