Do là dơ̆ pơrjum sơn rờp tơnơ̆ tŭ tơmŭt bal 3 càr Dăk Nông, Bình Thuận mờ Lâm Đồng gơ gơs càr Lâm Đồng pa. Yal tàm pơrjum pà gŏ, 6 nhai bồ nam, càr Lâm Đồng neh lơh geh uă cồng nha niam ngan: GRDP gơguh mờr 6%, drơng broă gơguh 7,9%, rề dia Dà lơgar lơh geh rlau 16 rơbô 800 tơmàn đong, gơguh 19%, tăc phan mờ lơgar ndai rlau 1 tơmàn 500 tơlak dolar Mỹ. Càr neh lơh sir 2 broă lơh bơt bơtàu phan bơna kwơ màng tàm tơrbŏ bal gùng rơndeh lòt mhar đah Tô – đah Jum mờ gơl gùng jat kềng gah dà lềng đah Jum Phan Thiết, mờ sền bal kung lơh sir broă lơh tơn jơh hìu lơh ing, hìu ồm sèt nhăt dà mìu.

Đơs tàm pơrjum, Củ tịc Mpồl duh broă Làng bol càr ồng Trần Hồng Thái đơs loh uă kal ke pal bơsong tàm tơngai tus, bè: gơguh lơh sa ờ hềt ndrờm pal mờ bơta ƀuơn bơta pràn, ai priă bơcri Dà lơgar lơyah. Pơrjum tơrgùm cribơyai, lơh nền ală broă kwơ màng bè kes priă, broă lơh dong kờl kwang bàng tơnơ̆ rơndăp tăp sèng sră pơ àr gơnoar atbồ mờ broă lơh bơtàu tơnguh lơh sa- mpồl bơtiàn.