Ờ uă mpồl lơh sa kă bro coh bŏ tàm càr Dăk Lăk kơlôi rơcang là, di lah khà dia pa geh ngui rơ̆p lơh ală cau blơi tàm lơgar Mỹ tam gơl jòi phan tus bơh lơgar Brazil ha là lơgar Colombia, do là bàr dà lơgar ờ hoan gơtìp gơrềng. Di lah ờ geh broă lơh di pal, gah kơphe lơgar Việt Nam rơ̆p gơtìp mờ bơta di gơlan roh drà kă bro.

Jăt ồng Lê Đình Tư, Kwang Lam bồ Kông ty TNHH MTV Minudo farm care đơs, bơdìh mờ ală gùng dà broă lơh bè: koh tơrmù priă tă, lơh geh gùng dà broă lơh, tơnguh uă bơta kwơ phan geh lơh, den broă pơn jăt tai “tăc” tus tàm drà kă bro tàm dơlam lơgar kung kwơ màng ngan sơl. "Tàm tơngai tŭ do, tơnguh broă tăc phan tàm drà kă bro tàm lơgar mờ ală bơta phan bơkah nàng bơsong ală kal ke bơh ală mpồl lơh sa kă bro coh bŏ tàm lơgar. Mờ nàng geh lơh sùm tàm tơnơ̆ do, he pal tam gơl să tờm he lài, lơh geh uă bơta drà kă bro mờ uă bơta tam pà drà kă bro in nàng tŭ drà kă bro do tam gơl den he gam geh uă drà kă bro ndai. He ờ gơtìp tàm bơta ờ thàn. Bŭ lah geh tam gơl lơi tai he kung gam bơtàu tơnguh kơl jăp”.

Lơgar Việt Nam là lơgar lơh kơphe dờng dơ̆ bàr tàm dunia mờ là tiah ai tờm gar kơphe Robusta dê, geh ngui uă tàm broă lơh kơphe klài bal mờ dà hùc ơn tàm khàr. Khà dia 46% di gơlan lơh gơguh uă ngan priă lơh gơs phan, lơh kơphe lơgar Việt Nam ờ pràn tàm broă pơrlòng rơlao tàm drà kă bro lơgar Mỹ. Bơta do di gơlan lơh gơtìp tus mờ bơta gơmù broă dan blơi bơh ală cau blơi gar kơphe bơh lơgar Mỹ dê mờ lơh gơmù khà priă tăc mờ kơphe mờ lơgar gơdìh lơgar Việt Nam dê.

Lài do, mờ khà dia 0%, kơphe lơgar Việt Nam di gơlan gơtùi tàm pơrlòng pràn tàm drà kă bro lơgar Mỹ. Tŭ do bơta pràn do mìng gam mờ kơphe gar gam bè ờs. ală bơta phan neh geh lơh gơs nền nòn bè kơphe klài rơ̆p gơtìp khà dia pa lơh ală mpồl lơh sa kă bro tăc phan mờ lơgar bơdìh di gơlan gơtìp kal ke uă. Mơya jăt ồng Trịnh Đức Minh, Củ tịc Tơrgùm ală mpồl kơphe Buôn Ma Thuột đơs, kơphe lơgar Việt Nam neh geh măt tus rơlao 100 lơgar, kơnhoàl ù tiah mờ neh geh uă broă lơh mờng chài nàng rơcang pleh mờ tam gơl bơh drà kă bro dê. Bơta pràn nàng tơnguh khà phan tăc mờ lơgar bơdìh tàm ală drà kă bro bè ờs bè: Mpồl tam klăc câu Âu (EU), lơgar Lo, Nhờk, Hàn Quốk… gam uă ngan nàng bơtơl broă tơrmù tăc tus tàm drà kă bro lơgar Mỹ. Ồng Trịnh Đức Minh mblàng: “Gah kơphe lơgar Việt Nam di gơlam tam gơl drà kă bro, rề ơnàng ală drà kă bro pa gam geh uă bơta kờñ uă, tài tàm mùl màl he neh lơh geh uă bơta drà kă bro, git nđờ rơhiang drà kă bro drà kă bro bloh. Ală drà kă bro tàm câu Á đơs bal gam uă ngan mờ he ờ tăc. Mờ tàm bơta priă tăc gơguh uă cau ngui mờng tam gơl ngui kơphe Robusta nàng tơrmù di mơ, di lah ngui kơphe Arabia den priă tăc gơguh uă rơlao bàr dơ̆ den kas ngan”.

Nàng rơcang pleh lài mờ ală bơta lòng do, ală mpồl lơh sa kă bro kơphe lơgar Việt Nam di gơlan gơtùi sền geh uă bơta drà kă bro mờ lơgar bơdìh, tơrgùm broă gơrềng tàm drà kă bro lơgar Mỹ. Bơdìh hơ̆ tai, broă tơnguh uă bơta bơkah phan geh lơh mờ bơ̆t bơtàu măt kă bro pràn kơl dang di gơlan geh dong kờl gơguh bơta kwơ mờ bơta pràn tàm pơrlòng tàm drà kă bro ală lơgar. Mờ cíñ phủ bal mờ ală mpồl tam klăc gah phan kă bro lơh ngan tơrña bơyai mờ lơgar Mỹ nàng jòi geh gùng dà broă lơh tơrmù ờ uă ngan bơta gơrềng ờ niam bơh broă tă dia pa dê.

Dơ̆ cri bơyai tàm điện thoại đah Tổng Ƀí thư ồng Tô Lâm mờ Kwang atbồ lơgar Mỹ ồng Donald Trump tàm mang ngai 04/04/2025 lài do neh đơs tus bơta git gơ̆p đah lơgar Việt Nam mờ lơgar Mỹ, tàm hơ̆ đơs uă bơta git gơ̆p kă bro phan đah bàr lơgar dê. Tổng Ƀí thư ồng Tô Lâm đơs ngan lơgar Việt Nam tŭ lơi kung crăp rơcang cri bơyai mờ đah lơgar Mỹ nàng ai geh khà dia blơi phan rê 0% gơwèt mờ phan kă bro blơi bơh lơgar Mỹ mờ kung sồr lơgar Mỹ ngui khà dia ndrờm bè hơ̆ sơl gơwèt mờ phan kă bro blơi bơh lơgar Việt Nam dê, pơn jăt tai blơi uă phan kă bro bơh lơgar Mỹ mờ lơgar Việt Nam kờñ mờ lam sồr, ai tơl bơta ƀuơn nàng ală kông ty bơh lơgar Mỹ sơlơ bơcri priă uă rơlao tai tàm lơgar Việt Nam. Dơ̆ cri bơyai tàm điện thoại neh geh ală cau gĭt wă jrô gah lơh sa mờ is ồn là ală mpồl lơh sa kă bro, tơrgùm ală mpồl gah phan đơs niam niam ngan mờ tơlik nùs nhơm gơn kơnờm ală cồng nha niam bơnĕ tàm git gơ̆p kă bro phan, tăc mờ blơi phan  Việt Nam mờ lơgar Mỹ dê tàm tơngai tus.