Bal mờ gùt lơgar, bơh lài satềp, tàm ờ uă càr tàm Tây Nguyên, ơruh pơnu tàm sơnam neh chờ hờp mờ jal mhar kham pràn kơl dang să jan nàng lòt ling. Nam 2025, càr Dăk Lăk geh jào rơlao 3 rơbô 30 nă cau lòt ling, tàm hơ̆ geh 2 rơbô 550 nă cau lòt ling tàm mpồl ling klàng mờ rơlao 480 nă cau lơh jăt kơnòl broă kwang àng làng bol. Tàm dơ̆ rơwah hòi ơruh pơnu lòt ling nam 2025 do, klao pơnu kòn cau Rơđê sơn đan Y Ra Ni Byă, deh nam 2005, kis tàm ƀòn Cư̆ Phiăng, sàh Hoà Phong, kơnhoàl Krông Bông, càr Dăk Lăk neh cih is sră nàng dan lòt ling.

Tơnơ̆ mờ ală ngai chờ satềp, Y Ra Ni neh rơcang lài nùs nhơm, rơcang tơl phan nàng lòt ling. “Añ chờ hờp ngan tŭ geh gơnoar atbồ ƀòn lơgar ai tơl bơta niam nàng añ geh lòt ling. Añ rơ̆p lơh ngan rơcang niam ngan nàng lòt ling drơng broă tàm mpồl ling klàng niam, lơh jăt ală kơnòl mờ kấp dờng jào. Tŭ lơh gơs kơnòl den añ rê mờ ƀòn lơgar nàng drơng broă hìu nhă bal mờ dong kờl mpồl bơtiàn, ƀòn lơgar in”.

“Nhai pe tiah nhàr lơgar” là broă lơh pah nam bơh ală mpồl lơhbroă Đoàn-Mpồl tàm càr Gia Lai dê nàng lơh mùl màl jơh srơh “Añ gơboh Dà lơgar añ”. Nhai 3 nam 2024, huyện Đoàn kơnhoàl Đức Cơ neh pơgồp bal bơyai lơh broă “Nhai pe tiah nhàr lơgar”, jào pà hìu nùs nhơm, ồs đèng măt tơngai mờ priă dong kờl bơsram ơruh pơnu, kơnòm pa tào mờ kơnòm dềt tàm kơnhoàl do in, mờ kham kòp, pà sơnơm ờ sa priă ai làng bol in. Pơn jăt mờ hơ̆ là broă “Cau kơnòm să càr Gia Lai bè tiah nhàr Dà lơgar” tàm sàh Ia Pnôn, kơnhoàl Đức Cơ dê nàng tơnguh uă jơnau git wă bè Adăt Tiah nhàr lơgar dà lơgar dê mờ tơrmù ờ uă ngan broă bao gờñ tàm đoàn viên, ơruh pơnu. Đoàn gam tus bal ală broă lơh nùs nhơm dong kờl is, pơs wàs kloh niam gùt dar hìu rông, hìu sơnơm.

Đoàn viên Siu H’ Thanh đơs là, lơh broă do neh ai tơngŏ gơnoar lam lài bơh Đoàn ơruh pơnu dê pơgồp bal tàm broă lơh geh uă nùs nhơm tam klăc bal, geh kơnòl bal tàm mpồl bơtiàn dê. “Añ là ơruh pơnu geh bơta pràn, să jan pràn kơl dang mờ sàh añ do là sàh tiah nhàr lơgar den tàng să tờm añ pal lơh ngan lơh broă nàng mpồl bơtiàn, drơng broă sàh tờm añ dê in nàng cồng nha geh niam bơnĕ bal mờ uă bơta chờ. Kwang bàng kấp dờng sền gròi ngan tus mờ bol añ mờ pà phan chờ satềp ai làng bol in, còp mờ kham kòp, pà sơnơm ờ sa priă ai làng bol in tai, cau lơi gơtìp kòp den sơm kòp tơn. Tŭ do satềp tus bloh, ală cau geh sền gròi tam pà bal mờ sàh tiah nhàr lơgar do mờ uă phan pà geh kwơ màng ngan nàng tam pà bal mờ ală kal ke bơh bol añ dê”.