Rơndăp mŭt tàm Mpồl Duh broă Đảng bộ càr Dăk Lăk tơngai lơh broă bơh nam 2025 tus 2030 geh 122 nă kwang bàng, Mpồl Lơh kơnòl broă sùm Tỉnh ủy geh 38 nă kwang bàng. Khà kwang bàng gàr tơl nùs nhơm pơn jăt tai, gơguh bal mờ bơtàu tơnguh đah ală rơnàng dê. Uă kwang bàng neh geh bơto, ntrờn, guh at gơnoar broă, ngui mờ gơs dờng pràn bơh tàm mpồl màl. Mơya rơndăp kwang bàng ờ mìng là rơwah tơl khà. Bơta kwơ màng rơlao là rơwah di cau mờ ai tơl bơta niam nàng kwang bàng dờng pràn.

Mùl màl pà gŏ khà kwang bàng kơnòm să, tàm hơ̆ uă ngan là tàm rơndăp mŭt Mpồl Duh broă Đảng bộ càr, gam ờ gal; khà kwang bàng cau ùr tàm ờ uă groăt ờ hềt uă. Bơta pràn gơdờp mờ broă lơh pa kung ờ hềt ndrờm. Geh kwang bàng gam kwi kwơ tŭ tam gơl ală gah broă kal ke bè priă jền, ù tiah, bơ̆t bơtàu. Tàm broă lơh broă lơh gơnoar atbồ bàr kấp, nùs nhơm ờ khin, ngòt tìs, ngòt geh kơnòl kung gam là broă pal geh kơlôi sơnơng song dơ pă. Bơh tàm mùl màl ală sàh, sơnah ƀòn, Bí thư Đảng ủy sàh Quảng Phú ồng Vũ Hồng Nhật đơs là, bơta was bơta pràn kwang bàng dŭt ndơl pal là cồng nha broă lơh. “Tŭ neh ai di tiah gơkòl pal tơrgùm bơta pràn, tam pà loh kơnòl broă mờ sền gròi tus dŭt ndơl nàng lơh geh tam gơl mùl màl; broă dơ̆ bàr pal ai cồng nha mùl màl lơh bơta was ai broă lơh in. Làng bol ờ sền kwang bàng mờ khà geh tàm dơ̆ pơrjum ha là sră nggal mờ pal mờ ală broă lơh mùl màl geh bơsram mờ ală tam gơl mờ làng bol sền gŏ tàm rài kis”.

Nùs nhơm do kung geh ai jơnau kờñ mùl màl ngan gơwèt mờ broă rơndăp kwang bàng: Ờ gơtùi mìng sền tàm pang sră, tàm jơnau bơsram neh geh ha là tàm broă lơh, mờ pal sền tàm bơta pràn bơsong broă, bơta pràn bơyai lơh mờ cồng nha broă lơh. Đơs tàm pơrjum, ồng Lương Nguyễn Minh Triết, Bí thư Tỉnh ủy càr Dăk Lăk đơs nền, rơndăp kwang bàng pal mùl màl là broă lơh ai geh kwang bàng geh bơta jăk; bơh tŭ hơ̆ đal git gờñ ală cau geh nùs nhơm niam, bồ tơngoh pràn, nùs nhơm geh bơngă pin dờn mờ geh tơl pràn nàng bơto, bơtơl, bơsram tàp di cau, di mờ jơnau kờñ: “Jơnau kờñ bơtàu tơnguh pa bơh càr dê pal geh mpồl kwang bàng lài jơh là pal tam gơl bồ tơngoh, nùs nhơm kơlôi sơnơng, broă lơh tàm bơta tŭ do. He ờ gơtùi lơh jăt nùs nhơm broă lơh mờng chài tai. Pal tam gơl pràn bơh bồ tơngoh atbồ tus mờ bồ tơngoh bơceh lơh bơtàu tơnguh, bơh broă bơsong broă lơh sră nggal tus mờ broă lơh geh cồng nha bơtàu tơnguh, bơh bồ tơngoh tơngai lơh broă krơi is tus mờ bồ tơnguh tơrgùm bal geh nùs nhơm pơgồp bal tiah”.