Jơh 10 kơnhoàl, ƀòn dờng tàm càr Kon Tum dơ̆ lĕ bơyai lơh jào ling dờp ling tàm drim òr (13/02). Tàm khà rơlao 980 nă klao pơnu jăk càr Kon Tum dê lòt ling sền gàr dà lơgar geh 800 nă klao pơnu lòt ling tàm ală mpồl ling mờ rơlao 180 nă klao pơnu mŭt tàm mpồl kwang àng. Tàm hơ̆, cau ling pa làng bol jơi bơtiàn ờ gal cau geh rơlao 80%. Kung tàm drim ngai òr (13/02), rơlao 2 rơbô 800 nă cau ling pa tàm ală tiah tàm càr Gia Lai kung neh lòt ling; tàm hơ̆ geh 2 rơbô 406 nă klao pơnu neh lòt ling mờ 469 lơh jăt kơnòl kwang àng.

Ală cau ling pa do rơ̆p lơh kơnòl broă ling klàng tàm ală mpồl ling, tàm hơ̆ geh: Mpồl ling tiah 5, Ling mpồl 34, Mpồl đơng lam ling sền gàr tiah nhàr lơgar càr Gia Lai, Mpồl đơng lam Ling klàng càr Gia Lai, Sư đoàn ling sền gàr kơl wàng trồ 372 gơwèt Mpồl Ling rơndeh par, Kwang àng càr Gia Lai.

Bal mờ gĭt nđờ jơ̆t rơbô nă ơruh pơnu tàm uă càr, ƀòn dờng tàm jơh gùt lơgar, drim ngai 13/02, rlau 3 rbô nă ơruh pơnu jak ngan tàm càr Dăk Lăk lòt gùng lơh jăt kơnòl pal lơh broă ling klàng. Tàm anih jàu- dờp ling tàm ƀòn dờng Buôn Ma Thuột, geh 359 nă ơruh pơnu jak ngan lòt ling. Cih is sră dan lơh jăt kơnòl pal lơh broă ling klàng dơ̆ do, cau ling pa là klau pơnu Y Dam Sam Niê kòn cau Rơđê ơm tàm sơnah ƀòn Ea Tam, ƀòn dờng Buôn Ma Thuột, yal: “să tờm pal pơnđơl sơrlèt ală kal ke tàm anih mpồl ling klàng, bơsram tàp gơ in niam ngan nàng sền gàr ƀòn lơgar tờm, sền gàr dà lơgar”.

Bal mờ ƀòn dờng Buôn Ma Thuột, dơ̆ jàu- dờp ling geh bơyai lơh dờng màng ngan tàm dồ ròt tàm 14 kơnhoàl, ƀòn drà dờng tàm càr Dăk Lăk. Jơh gùt càr geh 3 rbô 36 nă ơruh pơnu lòt ling dơ̆ do, tàm hơ̆ geh 160 nă cau neh lik klờng đại họk, kao đẳng, trung kâp; uă cau là đảng viên.

Dơ̆ do, càr Dăk Nông geh 1 rơbô 158 nă klao pơnu lòt ling. Tàm hơ̆ geh mờr 5% nă klao pơnu neh jơh bơsram kao đẳng mờ đại họk. ală klao pơnu jăk càr Dăk Nông lòt ling dơ̆ do tàm ală mpồl ling, tàm hơ̆ Ling mpồl 234 gơwèt Mpồl ling 34; Ling mpồl 2, gơwèt Ling tiah 5; Mpồl ling ù gờl 994, gơwèt Mpồl đơng lam Ling klàng càr Dăk Nông; Mpồl đơng lam ling sền gàr tiah nhàr lơgar càr Dăk Nông mờ Kwang àng càr Dăk Nông.

Kung tàm drim òr (13/02), rơlao 1 rơbô 200 nă klao pơnu càr Lâm Đồng neh lòt ling, tàm hơ̆ geh 535 nă cau ling pa jơi bơtiàn ờ gal cau. Tàm khà do geh 23 nă cau ling pa là đảng viên. ală klao pơnu do lòt ling mŭt tàm ală mpồl ling gơwèt Mpồl đơng lam ling klàng mờ Ling tiah 7.