Mờ 30 nam lơh broă, lŏ H’ Er Niê Kdăm, Cau mờng lơh broă tàm Cơl dŭ Jơi bơtiàn kơnhoàl Cư̆ Mgar, càr Dăk Lăk yal, lŏ gŏ geh broă dong kờl ai kwang bàng ơm lài mờ sơnam jơh lơh broă di jăt mờ Jơnau lơh nền tàm pơrjum sồ 178 là di pal. Lŏ H’ Er pin dờn là, ală kwang bàng kơnòm rơlao đòm jăt rơlao tai bơta pràn bơh să tờm dê bal mờ să tờm lŏ kung pơn jăt tai geh ală broă tă pơgồp di pal ai mpồl bơtiàn tàm ƀòn ơm kis dê. “Tơnơ̆ mờ tŭ ơm, añ rê mờ ƀòn lơgar. Tàm broă lơh añ dê neh git lài jơnau git wă mờ rơ̆p rê lơh broă mờ ƀòn lơgar, jơnau lơi làng bol ờ git den añ rơ̆p dong kờl, ai geh gùng dà broă lơh nàng làng bol lơh sa bơtàu tơnguh. Di lah añ geh tus bal lơh broă tàm ƀòn den añ rơ̆p lơh ngan dong kờl ƀòn lơgar”.

Kung ndrờm bè hơ̆ sơl, Cau chài Nguyễn Ngọc Giao, Lam bồ Cơl dŭ Broă lơh sa suơn sre mờ Bơtàu tơnguh Ƀòn lơgar kơnhoàl Cư̆ Mgar pà git, kung neh lơh sră dan ơm lài mờ sơnam sơl. Ồng Giao pin dờn là, dơ̆ rơndăp tăp sèng, tơrmù di pal mpồl kwang bàng lơh broă gam geh lơh jơh gùt mpồl lơh broă cíñ trị, rơ̆p cèng wơl geh cồng nha jŏ jòng ai làng bol bal mờ broă bơtàu tơnguh kơ̆ kơl jăp in. Mờ gah lơh broă sa suơn sre, rơ̆p dong kờl bơtàu tơnguh lơh sa suơn sre niam uă, cèng geh uă priă ai làng bol lơh broă sa suơn sre in. “Añ kơ̆p kờñ ală rơnàng pơn jăt tai tơnơ̆ do pal đòm jăt nùs nhơm lơh broă geh kơnòl mờ cồng nha bơh rơnàng lài neh lơh geh nàng lơh bè lơi tơnguh uă cồng nha, broă lơh tàm broă lơh jăt kơnòl cíñ trị bơh Đảng mờ Dà lơgar jào”.

Kờp tus ngai 10 nhai 1, kơnhoàl Cư̆ Mgar neh geh 16 nă kwang bàng cih sră dan ơm lài mờ sơnam jơh lơh broă geh ai. Ồng Nguyễn Thiên, Phó Ƀí thư Duh broă sùm Huyện ủy kơnhoàl Cư̆ Mgar pà git, Mpồl duh broă sùm Huyện ủy rơ̆p sền tus tơl nă cau, gàr niam gơnoar di pal di jăt mờ jơnau geh ai tàm adăt boh lam dê. Ồng Nguyễn Thiên kung đơs tai: “Añ pin là ală kwang bàng kung neh git jơnau kờñ, jơnau kwơ bơh broă rơndăp tăp sèng tơrmù di pal mpồl kwang bàng lơh broă. Tŭ lơh broă nùs nhơm den ală kwang bàng chờ hờp ngan, den tàng tàm broă rơndăp mpồl kwang bàng, ală kwang bàng dan is den Mpồl rơndăp broă kung ƀuơn rơlao mờ tŭ geh broă dong kờl den kung lơh ngan ai tơl bơta niam nàng ală kwang bàng do in geh dờp di mờ jơnau geh ai”.

Bal mờ kơnhoàl Cư̆ Mgar, ală tiah ndai tàm càr Dăk Lăk kung neh gŏ geh uă kwang bàng dan ơm lài mờ sơnam geh ai ơm jơh lơh broă jăt mờ Jơnau lơh nền tàm pơrjum sồ 18 dê sơl. Neh geh 7 nă kwang bàng, đảng viên gơwèt Mpồl duh broă lơh kơnòl broă sùm Tỉñ ủy atbồ, tàm hơ̆ geh 2 nă geh jơng tàm Mpồl duh broă lơh kơnòl broă sùm Tỉñ ủy, 1 Ƀí thư Huyện ủy kung cih sră dan ơm tơn jơh lơh broă lài mờ sơnam geh ai. Là Ƀí thư Huyện ủy sơnrờp ngan càr Dăk Lăk dê dan cih sră ơm tơn jơh lơh broă lài mờ sơnam tŭ gam rơlao 6 nam tai lơh broă, ồng Ra Lan Vôn Ga, Ƀí thư Huyện ủy kơnhoàl Mdrăk pà git: “Añ ơm den añ kơ̆p kờñ là geh anih nàng ai mpồl rơndăp broă kung bè ală mpồl lơh broă tàm broă rơndăp tăp sèng tơrgùm bal geh kwang bàng kơnòm jăk chài rơlao mờ añ, pràn kơl dang rơlao mờ añ nàng pơn jăt tai lơh broă dong kờl kơnhoàl bal mờ càr ngai sơlơ bơtàu tơnguh. Tŭ añ geh ơm lơh broă, gam pràn kơl dang mờ bơta ngăc ngar dê, añ rơ̆p jòi geh dùl broă lơh di pal nàng pơn jăt tai lơh broă pơgồp bal tàm broă bơtàu tơnguh bơh să tờm dê kung bè mpồl bơtiàn dê tai”.

Ồng Nguyễn Thượng Hải, Lam bồ Mpồl Rơndăp broă Tỉñ ủy càr Dăk Lăk pà git, jăt broă rơndăp lơh, càr rơ̆p tơrmù di pal 15% mpồl lơh broă tàm dơlam tơnơ̆ mờ tŭ neh tơrgùm bal mờ tơrmù 20% cau lơh broă. Broă ală kwang bàng, đảng viên neh cih is sră dan ơm lơh broă lài mờ tơngai geh ai là broă lơh niam bơnĕ ngan, bơh broă do geh dong kờl càr ƀuơn rơlao tàm broă lơh jăt Rơndăp broă rơndăp tăp sèng, tơrmù di pal mpồl kwang bàng lơh broă: “Geh uă kwang bàng gam rơlao 5 nam lơh broă tai kung gam tơl sơnam nàng lơh kơnòl broă pơn jăt tai, mơya ală kwang bàng kung gam kờñ ai tơl bơta niam nàng kwang bàng kơnòm să tơnơ̆ do in geh bơta niam nàng lơh ngan bơtàu tơnguh ai geh bơta tam gơl pràn kơl dang, jal mhar nàng ai càr, ai mpồl lơh broă bơtàu tơnguh pràn kơl dang rơlao tai kung bè ai dà lơgar he in brồ să”.

Broă ală kwang bàng cih is sră nàng dan ơm jơh lơh broă lài mờ sơnam tàm càr Dăk Lăk gam lơh geh bơta ƀuơn càr in tàm broă rơndăp tăp cèng tơrmù di pal mpồl kwang bàng lơh broă. Do kung là broă tam jào geh kơnòl, dong kờl tơnguh uă cồng nha lơh broă, ai geh bơta pràn càr Dăk Lăk in bơtàu tơnguh.