Rlau 1 poh do, tàm Hìu Yàng bàp Châu Sơn, xã Cư Êbur, ƀòn dờng Buôn Ma Thuột, làng bol jat Yàng bàp neh tơrgùm să bơka phan rcang wă ròng pơrjum kah Ngai Kơnrañ lik lìng. Cau lơi cau hơ̆ ndrờm hờñ chờ lơm. Cau crăp bong đèng, cau dŭi che đèng, cau den lơh niam wơl rơgồng lŭ, cau ntào mpồng mut gờm chờ, lơh ngan pơdềt tơl pèt đềs, pơdềt tơl phan pơdềt tàm rơgồng lŭ. Ồng Trần Trọng Khánh, Kwang atbồ thôn 2, xã Cư Êbur đơs:“Pah nam jat bơhiàn den bol añ lơh rơgồng lŭ kung bè jơh ală bơta bơka tàm gùng ƀòn nàng lơh niam ai ù tiah tàm ngai pơrjum kah Ngai Kơnrañ lik lìng mờ kung tàm nùs nhơm do là jờng rơ Yàng Tơm Trồ mờ lơh mbè lơi nàng geh nùs nhơm tam klăc bal mờ làng bol jat Yàng bàp kung bè làng bol tàm jơh kơnhoàl ù tiah dê”.

Ală ngai do, bulah gam ờ ru ngan mờ kàl tơnhào kơphê, mơya làng bol jat Yàng bàp tàm xã Ea Tiêu, kơnhoàl Cư Kuiñ, kung gam lời tŭ tơngai nàng bơka phan tàm hìu bơnhă mờ Hìu Yàng dê. Rơwah nền nòn ngan ală phan bơka ai tờm nho Noel in, ồng Nguyễn Phước Thành, ơm tàm thôn 1, xã Ea Tiêu, kơnhoàl Cư Kuiñ pà gĭt: “Gơwèt mờ nam lài den Noel nam do brơn brài rlau, tài bơh giă tăc phan gơguh, đơs bal hìu lơi kung bơka niam lơm. Kung lơh rơgồng lŭ tàm hìu bơnhă, ƀòn lơgar, tơl sơnĕ gùng lòt lơh dùl nơm rơgồng lŭ. Đơs bal là nùs nhơm Noel chờ hờp ngan”.

Kung tàm bơta hơn chờ wă rò Ngai Kơnràñ Lik ling, bi Trần Thị Anh Thi, ơm tàm sơnah ƀòn Tân Thành, ƀòn dờng Buôn Ma Thuột pà gĭt, drà ràng tăc phan Noel nam do li la uă ngan bè ală bơta, ală dà sơng phan bơna dê, khat gơboh ai tơl nă cau bơceh lơh in:“Oh bơka Noel jat bơhiàn ală nam bơh hìu bơnhă oh dê lơm. Hìu oh geh lờs phan bơka tàm hìu, tus kàl kah Noel den rơ̆p ai tờm nho yau nàng ngui, bơta lơi he ờ tơl den he lòt blơi tai. Bè nam do oh kờñ tông bạc den oh blơi tai tông bạc lơm”.

Bi Lê Thị Kim Anh, cau tờm anih tăc phan tàm gùng Lý Thường Kiệt, ƀòn dờng Buôn Ma Thuột pà gĭt, kàl Noel nam do, geh uă ngan phan lơh mờ tê niam măt ngan, tơngŏ bơta nền nòn, lơh jơh nùs ngan tàm tơl ală bơta: “Nam do năc blơi phan gờñ ngan, is ồn là ală hìu drơng broă ñô sa, anih lơh broă den ală anih tăc dà kơphê khi kờñ bơka gờñ nàng gơ hòi gơ jà năc. Tơngai do mìng geh hìu bơnhă rơwah blơi phan bơka tờm nho, bơka rơgồng lŭ. Lơh sa bơtàu tơnguh den jơnau kờñ ngai sơlơ uă den sồr phan bơka ngai sơlơ niam rlau tai”.

Dùl kàl pơrjum kah Ngai Kơnràñ Lik ling gam rê tàm bơta hờn chờ brờn brài bơh làng bol jat Yàng bàp tàm càr Dăk Lăk dê, wèt tus dùl nam pa bềng lìu bơta hờn chờ mờ kis chờ hờp.