Đơs tàm dơ̆ bơyai lơh, ồng Hồ Quốc Dũng, Phó Thủ tướng sồr bơtàu tơnguh Anih Kơlôi sơnơng Năng lượng nguyên tử Việt Nam gơs mpồl tờm tàm kơlôi sơnơng jak chài, bơtàu tơnguh măi mok, dong kờl bơta chài măi mok mờ bơto bơtê bè năng lượng hạt nhân.

Phó Thủ tướng đơs sùm Đảng, Dà lơgar sền gĭt năng lượng hạt nhân geh gơnoar broă kwơ màng tàm gàr niam lơngăp lơngai năng lượng mờ lơh jat jơnau kờñ tuh tơlik nhơm ƀơ̆ lik bơdìh ndrờm mờ 0 tàm nam 2050. Chính phủ gam mhar rơcang lam lơh Rơndăp broă lơh Hìu măi đèng hạt nhân Ninh Thuận 1 mờ rơndăp broă lơh kơlôi sơnơng jak chài, măi mok hạt nhân tàm Đồng Nai. Do là ală rơndăp broă lơh kwơ màng bơh dà lơgar dê, sồr ală anih lơh broă geh gơrềng, tàm hơ̆ geh Anih kơlôi sơnơng Năng lượng nguyên tử Việt Nam pal tơrgùm uă bơta pràn mờ lam lơh jat.