Wă Kwang atbồ anih lơh broă ala măt lơgar Canada, Thủ tướng đơs nền, lơgar Việt Nam sền lơgar Canada là lơgar lơh broă bal kwơ màng mờ kơ̆p kờñ bơtàu tơnguh git gơ̆p Tam klăc bal tơl ală bơta ngai sơlơ nền nòn, wèt tus gờñ ai git gơ̆p gơguh tàm bơta gơguh pa. Thủ tướng sồr lơgar Canada pơn jăt tai pờ mpồng ai phan kă bro bơh lơgar Việt Nam, tàm hơ̆ uă ngan là ală bơta phan geh lơh bơh broă lơh sa suơn sre, phan tàm dà; tơnguh lơh broă bal bơto cau lơh broă tàm ală gah broă măi mok pa. Bàr gah pơn jăt tai pơgồp bal nền nòn, geh cồng nha, kờñ bal tàm ală mpồl lơh broă, pơrjum bơyai tàm tiah do mờ tàm ală lơgar, tàm hơ̆ uă ngan là tàm Jơnau kĭ hơ Tam klăc lơh broă bal Tơl làm mờ Gơguh jăk (CPTPP) mờ lơgar Việt lơh Chủ tịch tàm nam 2026 mờ Anih cribơyai Lơh broă bal Lơh sa châu Á – Thái Bình Dương (APEC) mờ lơgar Việt Nam lơh chủ tịch tàm nam 2027.

Wă Kwang atbồ anih lơh broă ala măt lơgar Hàn Quốc, Thủ tướng đơs nền Chính phủ lơgar Việt Nam rơ̆p ai geh ală bơta ƀuơn nàng mpồl lơh sa kă bro lơgar bơdìh in, tàm hơ̆ geh mpồl lơh sa kă bro lơgar Hàn Quốc iang nùs bơcri priă kơl jăp, jŏ jòng tàm lơgar Việt Nam. Ồng sồr bàr gah tơnguh lơh broă bal niam chài mờ dong kờl lơgar Việt Nam bơtàu tơnguh gah lơh sa mờ măi mok niam chài; rề ơnàng gah tìp bal làng bol bơh broă tơnguh broă dờp cau lơh broă lơgar Việt Nam tus lơgar Hàn Quốc nàng lơh broă.

Wă Kwang atbồ anih lơh broă ala măt lơgar Australia, ồng Lê Minh Hưng, Thủ tướng Chính phủ tơlik nùs nhơm chờ hờp tŭ jơh 6 gah broă tờm tàm Broă lơh git gơ̆p Tam klăc bal Kwơ màng Tơl ală bơta đah lơgar Việt Nam mờ lơgar Australia tơngai bơh nam 2024 tus 2027 ndrờm geh lơh di tơngai, tus tŭ do neh lơh gơs 96%. Đơs nền bàr lơgar gam geh uă bơta niam lơh broă bal, Thủ tướng sồr bàr gah lơh jăt ală gùng dà broă lơh pràn nàng lơh jơh jơnau kờñ gơguh kă bro phan tus 20 tơlăk Dolar Mỹ mờ tơnguh uă rơlao bàr dơ̆ bơcri priă bàr đah tàm tơngai tus.