Drim òr (01/07), Mpồl duh broă làng bol càr Gia Lai (pa) bơyai lơh pơrjum dơ̆ 1,tơngai lơh broă bơh nam 2021 tus nam 2026. Do là dơ̆ pơrjum geh gơtha cíñ trị, adat boh lam mờ ngan ngồn kuơmàng, lơh tềl bơta kah yau tàm tŭ tơngai bơt bơtàu càr Gia Lai (pa), wèt tus bơtàu tơnguh mhar, kơ̆ kơljap jŏ jòng sùm, brồ guh tus kâp kơnhoàl ù tiah mờ dà lơgar. Mpồl duh broă làng bol càr Gia Lai (pa) khoă XII geh 119 nă cau ala mat.

Tàm pơrjum, Mpồl duh broă làng bol neh yal Jơnau lơh nền tàm pơrjum bơh Anih duh broă lơh kơnòl broă sùm Quôk hội dê bè broă sồr ală gơnoar broă đơng lam bồ Mpồl duh broă làng bol càr. Jat hơ̆, ồng Rah Lan Chung, Phó Ƀí thư Duh broă sùm Tỉñ ủy càr geh sồr at gơnoar broă Củ tịc Mpồl duh broă làng bol càr Gia Lai (pa) tơngai lơh broă bơh nam 2021 tus nam 2026; ồng Trương Văn Đạt, Kwang geh jơng Mpồl lơh kơnòl broă sùm Tỉñ ủy càr mờ mò Huỳnh Thúy Vân, Kwang geh jơng tàm Tỉñ ủy càr geh sồr at gơnoar broă Phó Củ tịc Mpồl duh broă làng bol càr Gia Lai (pa). Anih duh broă lơh kơnòl broă sùm Quôk hội sồr mò Đinh Ly An at gơnoar broă cau lam bồ mpồl adat boh lam; ồng Phạm Tấn Thành at gơnoar broă Cau lam bồ Mpồl Lơh sa – Kes priă; mò Huỳnh Ngọc Hà at gơnoar broă lam bồ Mpồl niam chài – mpồl bơtiàn bơh Mpồl duh broă làng bol càr Gia Lai (pa) dê tơngai lơh broă bơh nam 2021 tus nam 2026. Đơs dờp kơnòl broă, ồng Rah Lan Chung, Củ tịc Mpồl duh broă làng bol càr Gia Lai (pa) pà git, mờ gơnoar broă bal mờ kơnòl broă dờng màng geh jàu, ồng rơp tàm pơn jat tai ală cồng nha lơh geh bơh ală tơngai lơh broă lài dê, cèng jơh bơta pràn, bồ tơngoh jak mờ nùs tồr nàng drơng broă làng bol in, di ngan là cau ala mat geh làng bol pồ, lơh gơs niam kơnòl broă geh jàu.