Drim ngai 01/7, đơng lam pơrjum gùt lơgar sền wơl broă lơh gơnoar atbồ 3 kâp, ồng Tô Lâm - Tổng Bí thư, Chủ tịch lơgar sồr pơn jat tai lơh sir kơrnuat boh lam, lơh pràn tam pà kâp, jàu gơnoar pơgồp bal mờ gròi sền gơnăp gơnoar, bơt bơtàu mpồl kwang bàng lơh jat jơnau sồr, gàr mpồl lơh broă sră pơ àr gơnoar atbồ pa lơh broă geh cồng nha, drơng niam rlau ai làng bol mờ mpồl lơh sa kă bro in. Ồng Tô Lâm - Tổng Bí thư, Chủ tịch lơgar đơs nền, jơnau lơh nền rơndap tap sèng, tơrmù dipal mpồl lơh broă sră pơ àr gơnoar atbồ bơh anih lơh broă chính trị dê là di ngan, kờñ pal lơh mờ geh gơtha kuơmàng gơ wèt mờ bơta bơtàu tơnguh dà lơgar dê.

Tơngai tus, kờñ pal sền nền wơl, lơh sir ndrờm bal ală adat boh lam, gàr bơta ring bal, loh làng, ƀuơn ƀuài ai broă lam lơh jat tàm jơh bal 3 kâp gơnoar atbồ in. Kâp ủy pal đơng lam mờ gùng dà, broă rơndap lơh kuơmàng, mờ kơrnuat boh lam, mờ broă lơh kwang bàng, mờ sền swì, jat sền, kơlôi sơnơng cồng nha lơh geh. Pal gàr bơta đơng lam tơl làm Đảng dê, mơya ờ lơh ala, ờ lơh thoàr, ờ ƀư tê mờ sră pơ àr ờ duh pal geh tàm kơnòl broă bơh ală anih lơh broă dà lơgar, Mặt trận dà lơgar mờ ală mpồl chính trị mpồl bơtiàn dê.