Pà git 7 tơngume nàng pơn jat tai lơh sir yal jơnau tơn jơh tàm tơngai tus, ồng Tô Lâm- Tổng Bí thư, Chủ tịch lơgar đơs sùm, tơn jơh pal song dơ pă sền dờp ală bơta ờ hềt pràn, bơta ờ niam, ală broă ờ hềt lơh geh cồng nha, ală jơnau bơsram, ală bơta gơ kòl kờñ pal pơn jat tai tă bơsong; mơkung pal lơh tơngŏ ală jơnau bơsram mờng chài cèng bơta pal jat, bè: kơ̆ nùs mờ jơnau kờñ lơngăp lơngai is jơi bơtiàn mờ chủ nghĩa sàh hội; sùm tam gơl pa bơceh lơh jat tàm bơnàng jă gàr kơ̆ jơnau pal jat; làng bol là tờm; bơt bơtàu Đảng sàng goh, kơ̆ pràn tơl làm; bơsong di ngan ală bơta gĭt gơ̆p dờng...

Tổng Bí thư, Chủ tịch lơgar sồr, is ồn sền dờng màng sền gĭt bơta wèt sền mờ pơlam gùng dà đơng lam bơtàu tơnguh Dà lơgar tàm 100 nam tus. Ồng kung sồr, iăt kơno, hòi jà tă pơgồp bal bồ tơngoh jak bơh gùt Đảng, bơh ală anih lơh broă kơlôi sơnơng, ală cau jak chài, cau gĭt wă jrô broă lơh, ală rơnàng đơng lam bồ, atbồ bơh ală rài. Bơdìh mờ tơngume broă ờs mờng, tơngkah pal lơh nền nòn broă lam lơh jat, tài bơh broă lơh dờng ngan, jơnau sồr uă ngan, tŭ tơngai gơ lòt mhar ngan, den tàng dilah rơndăp broă lơh ờ niam den kal ke ngan lơh di tơngai mờ cồng nha.