Đơs tàm dơ̆ lơh broă, ồng Tô Lâm, Tổng Bí thư, Chủ tịch lơgar đơs sùm 3 tơngume dờng, tàm hơ̆ pal ơn lơh sa mờ măy mŏk gùng dà lềng dà lơgar di anih tàm broă rơndăp lơh jŏ jòng bơ̆t bơtàu Việt Nam gơgơs dà lơgar dà lềng pràn. Do là pràn jak lơh sa mờ măy mŏk tờm ngan, drơng bơtàu tơngguh lơh sa dà lềng, rơndăp ală gùng lòt rê tàm dà, gàr niam sền gàr dà lơgar – lơngăp lơngai mờ tơngguh uă pràn jak rơcăng lài jŏ jòng.

Đơs bè kơnòl broă tềng đăp măt, Tổng Bí thư, Chủ tịch lơgar sồr, tơrgùm pờ khoă drà kă bro, jòi lơh geh cồng nha pràn jak gam geh tŭ do mờ bơsong 06 anih gơkòl; Anih duh broă Đơng lam Đảng Chính phủ đơng lam, sồr lơh sơrbăc mhar bơ̆t bơtàu Broă lơh dà lơgar bơtàu tơngguh lơh sa mờ măy mŏk lơh ơhò mờ bơceh mòn, ngui măy mŏk dà lềng tus nam 2035, wèt sền tus nam 2050. Bè jŏ jòng, ồng Tô Lâm, Tổng Bí thư, Chủ tịch lơgar sồr, pal tam gơl bơh gàr sùm pràn jak lơh gơlik phan tus bơ̆t bơtàu ală mpồl lơh sa mờ măy mŏk gùng dà lềng mờ gùng lòt pa tŭ do, tơlir, sồ, geh tơl pràn rơcăng lài is mờ tàm pơrlòng ală lơgar.