Tàm pơrjum, ală cau ala mat iăt jơnau yal mờ cribơyai bè bơta lơh sa - mpồl bơtiàn nhai 6 mờ 6 nhai bồ nam 2026; bơta tam pà, ai priă bơcri dà lơgar, lơh jat broă lơh jơnau kờñ dà lơgar, sền sơ wì bơta lơh jat kes priă dà lơgar 6 nhai bồ nam 2026; bè broă lơh đơng lam, sồr lơh bơh Chính phủ, Thủ tướng Chính phủ dê nhai 6 mờ 6 nhai bồ nam; kơnòl broă tờm pal tơrgùm đơng lam tàm tơngai tus; bè broă lơh rcang lài ai nam bơsram pa 2026 -2027 mờ bàr pe tơngume ndai. 6 nhai bồ nam 2026, lơh sa dờng sền bal kơ̆ kơl jăp. Gơguh tai lơh sa pơn jat tai gàr niam khà gơguh niam ngan. GDP qúy 2 kờp dŭ gơguh 8,39%, ai khà gơguh tai 6 nhai gơguh 8,18%.

Đơs tàm dar pơrjum, ồng Tô Lâm, Tổng Bí thư, Chủ tịch lơgar đơs là dà lơgar gam ơm tềng đăp tŭ tơngai niam bơtàu tơnguh dờng, mơya tŭ tơngai niam mìng gơs ngan ngồn tŭ jơh gùt lơgar geh nùs nhơm lơh ngan uă, kơlôi sơnơng di, broă lơh niam, mpồl lơh broă mut lơh geh cồng nha, kwang bàng khin lơh, mpồl lơh sa kă bro pràn rlau, làng bol dùl nùs bal, den tàng bè hơ̆, nùs nhơm bal là pal jơh nùs lơh ngan uă rlau tai, lơh broă pràn kơl dang rlau, bơyai lơh jat kràñ cê jơh nùs rlau, pơnđơl pràn lơh sir uă ngan rlau jơh ală jơnau kờñ nam 2026, lơh geh bơnàng jă kơ̆ kơnhăp ai nam 2027 mờ jơh bal tŭ tơngai bơtàu tơnguh pa bơh Dà lơgar dê.