Drim ngai 4/6, tàm Anih tờm Pơrjum Dà lơgar, Hà Nội, Pơrjum dờng dơ̆ 14 Công đoàn Việt Nam tơngai lơh broă bơh nam 2026-2031 lơh dar pơrjum yŭ rơyùm mờ bơta tus bal bơh ồng Tô Lâm- Tổng Bí thư, Chủ tịch lơgar bal mờ uă oh mi đơng lam bồ, đơng lam bồ Đảng, Dà lơgar lài do. Mờ gùng dà broă lơh “Tam klăc- Làng bol lơh tờm- Duh rơngòt kơrnoat boh lam- Tam gơl pa- Bơtàu tơnguh”, Pơrjum dờng tơrgùm tơn jơh broă lơh jat Jơnau lơh nền tàm Pơrjum dờng dơ̆ 13 Công đoàn Việt Nam dê tơngai lơh broă bơh nam 2023-2026; sền is tìs di broă lơh Mpồl duh broă Tổng Liên đoàn Lao động Việt Nam khoă 13; sền gĭt jơnau kờñ, kơnòl broă mờ ală broă lơh tam gơl pràn ai tơngai lơh broă pa in.

Đơs đơng lam, ồng Tô Lâm- Tổng Bí thư, Chủ tịch lơgar đơs sùm rơnàng cau lơh phan sùm là mpồl lam lài bơh kăc màng Việt Nam dê, lơh gơlik tơn phan bơna mờ bơt bơtàu bơnàng jă lơh sa Dà lơgar in. Mơkung sồr mpồl Công đoàn tam gơl pa mhar rlau, jrô rlau mờ ngan ngồn rlau; tơrgùm lơh jat 6 kơnòl broă tờm, bơt bơtàu rơnàng cau lơh phan pa ngan, dờng pràn, tơnguh uă bơta gĭt wă broă lơh, bơta chài sồ mờ bơta pràn gơ dờp ai cau lơh broă in tàm tơngai bơtàu tơnguh pa.