Tàm dơ̆ wă, ồng Tô Lâm, Tổng Bí thư, Chủ tịc lơgar đơs nền, Đảng, Dà lơgar bal mờ Làng bol lơgar Việt Nam jơh nùs sền kwơ bơta git gơ̆p Tam klăc bal jŏ jòng mờ lơgar Đức, sùm sền lơgar Đức là lơh broă bal kwơ màng lài ngan đah lơgar Việt Nam dê tàm châu Âu.

Ồng Tô Lâm, Tổng Bí thư, Chủ tịc lơgar đơs ờ uă gùng dà broă lơh bal kwơ màng đah bàr lơgar tàm tơngai tus, tàm hơ̆ pal tơnguh nùs nhơm pin dờn chính trị bơh broă tam gơl mpồl, tìp bal kấp dờng mờ dờng ngan tàm ală gah Đảng, Dà lơgar mờ Quốc hội, ngui niam Kơrnoăt hơ bal Kă bro phan khăt gơboh đah lơgar Việt Nam mờ Mpồl tam klăc châu Âu (EU)  (EVFTA) nàng gờñ tơnguh khà priă kă bro phan đah bàr lơgar rơlao 20 tơmàn Dolar Mỹ, geh sùm broă bàr lơgar là drà kă bro dờng ngan tàm EU mờ ASEAN dê; mờ tơnguh lơh broă bal mùl màl, geh cồng nha tàm ală gah broă krơi is bè bơta jăk chài, măi mok, tam gơl bơceh lơh, tam gơl sồ, lơh sa tơlir, lơh sa gơlòt bal. Phó Chủ tịc Quốc hội ồng Bodo Ramelow ring bal mờ Tổng Bí thư, Chủ tịc lơgar bè broă tơnguh broă tìp bal làng bol, tìp bal niam chài, tơnguh mpồl bơtiàn rơlao 200 rơbô nă cau lơgar Việt Nam tàm lơgar Đức kung bè git nđờ rơbô nă cau lơgar Việt Nam neh geh tŭ bơsram, lơh broă tàm lơgar Đức nàng tơnguh bơta pràn git gơ̆p lơh bơyô bal, lơh broă bal kơl jăp đah bàr lơgar dê.