Đơs sơnđờm dar pơrjum dơ̆ 4 bơh Anih duh broă Lơh kơnòl broă sùm Quốc hội drim ngai 8 nhai 7, tàm Hìu Quốc hội, ồng Trần Thanh Mẫn, Chủ tịch Quốc hội đơs sùm, dilah ờ gàr niam bơta niam, tŭ tơngai mut lơh jat broă lơh den Bộ trưởng, Kwang lam bồ anih lơh broă đơng lam cih jơnau mờ anih lơh broă đơng lam sền sơwì pal kong kơnòl tềng đăp Chính phủ, Thủ tướng Chính phủ mờ tềng đăp Anih duh broă Lơh kơnòl broă sùm Quốk hội.

Chủ tịch Quốc hội sồr gơwèt mờ ală broă dờng gam geh jơnau đơs krơi is, halà geh broă lơh pa krơi mờ jơnau cih bơh adat boh lam gam ngui tŭ do dê, ală anih lơh broă kờñ pal rcang lài pơgồp bal mờ ală anih lơh broă Quốc hội nàng di tŭ yal mờ kấp geh gơnăp gơnoar in sền sơwì, lơh nền; ờ gŏ di lời gơ tơrgùm uă broă lơh tàm tơngai dŭt ndơl bơh tơl dar pơrjum, dơ̆ pơrjum. Ồng Trần Thanh Mẫn, Chủ tịch Quốc hội dùl dơ̆ tai đơs sùm, adat pal lòt bal mờ ring bal mờ Jơnau lơh nền bơh Chính phủ dê, Jơnau bơto sồr den ală broă lơh nền bơh Quôk hội dê tàm pah dơ̆ pơrjum pa geh bơta kwơ mờ gờñ gơ lòt mut tàm rài kis. Do kung là bơta mờ làng bol mờ mpồl lơh sa kă bro gam kơ̆p gơn ngan.