Tơngai pa do, làng bol ală jơi bơtiàn dồ ết nă cau mờ tiah kơh bơnơm tàm jơh gùt lơgar neh pơn đơl pràn lơh ngan tàm broă lam lơh jat dồ ròt bal ală broă broă lơh dong kờl tàm tiah làng bol jơi bơtiàn dồ ết nă cau mờ tiah kơh bơnơm mờ ală broă lơh dong kờl gàr tơl niam rài kis mpồl bơtiàn den tàng rài kis làng bol dê sùm geh tam gơl, rơndăp tăp sèng lơh sa geh bơta tàm ntrờn jơh nùs, broă lơh sa bơh làng bol dê ngai sơlơ li la uă ngan; priă lơh geh sơlơ tơnguh. Khà hìu bơnhă rƀah gơmù mhar; bơto bơtê, gah lơh sơnơm geh sền gròi; niam chài, bơhiàn niam bơnĕ geh prap gàr mờ ngui niam. Bơta lơngăp lơngai rơndăp tăp sèng geh gàr kơ̆; mpồl tam klăc dờng ală jơi bơtiàn geh kơ̆ kơl jăp mờ sơlơ geh lơh jat uă. Khà gơguh lơh sa ală càr tiah làng bol jơi bơtiàn dồ ết nă cau mờ tiah kơh bơnơm uă, tàm hơ̆ ală càr tàm tiah đah Tô mat tơngai Mut gơguh kờp bal 8,0% dồ nam, Tây Nguyên gơguh kờp bal 7,5% dồ nam, Tiah đah Jum mat tơngai Mut dà lơgar gơguh kờp bal 7,0% dồ nam...

Jat Ƀộ trưởng, Cau drơng kơnòl Anih duh broă Jơi bơtiàn ồng Hầu A Lềnh yal, tàm nam do, broă lơh jơi bơtiàn kung gam bàr pe bơta ờ hoan niam, tàm hơ̆, broă lam lơh bàr pe Ală jơnau neh lơh nền, broă lơh gam kòl yan, tàm hơ̆ broă lơh jơnau kờñ Dà lơgar jơi bơtiàn dồ ết nă cau mờ tiah kơh bơnơm ờ hềt lơh geh pơndrờm mờ jơnau sồr geh ai: “Mờ broă lam lơh jat ală tiah den kung geh ală tiah lam lơh pơn đơl pràn lơh ngan, lơh geh dùl khà ai priă là uă ngan jơh bal bè bơcri priă, jơh bal bè tă ngui sùm, mơya kung gam geh ală tiah là broă lam lơh kung gam ờ pràn rlau, ờ hềt lơh geh pơndrờm mờ jơnau sồr geh ai. Kờp bal jơh gùt lơgar, broă lơh jơnau kờñ Dà lơgar kung lơh geh khà ai priă uă, mơya, pơndrờm mờ jơnau kờñ bơh Cíñ phủ dê ai den kung ờ hềt lơh geh mờ jơnau kờñ. Gĭt wă bơh làng bol dê, bơta dồ nùs dồ tồr bal tus bal bơh làng bol dê gam ờ hoàn pràn”.

Nàm 2025, Anih duh broă Jơi bơtiàn ai tơlik 12 kơnòl broă tờm, tàm hơ̆ lam lơh jat, lơh sir rơndăp tăp sèng ală mpồl lơh broă jơi bơtiàn tàm Dà lơgar mờ ală tiah nàng mut lơh broă mơ tơn bơh bồ nam 2025. Tàm pơrjum, ala mat ală tiah kung đơs bàr pe kal ke, kòl yan tàm broă lam lơh broă lơh jơi bơtiàn tàm ală tiah, mơkung dan broă lơh tă bơsong.

Đơs tàm pơrjum, Phó Thủ tướng ồng Nguyễn Hoà Bình đơs nền, broă lơh jơi bơtiàn mờ broă dong kờl jơi bơtiàn sùm geh Đảng mờ Dà lơgar sền gròi bơh broă lơh jơnau kờñ Dà lơgar neh gơ lòt mut tàm rài kis làng bol jơi bơtiàn dồ ết nă cau mờ tiah kơh bơnơm. Lơh sa gơguh, rài kis bơh làng bol jơi bơtiàn dồ ết nă cau mờ tiah kơh bơnơm neh geh tam gơl, bơh hơ̆ cih yal broă lơh dong kờl bơh Đảng mờ Dà lơgar dê neh lòt mut tàm rài kis. Bulah bè hơ̆, tàm nam 2024, Anih duh broă Jơi bơtiàn kung gam 7 tàm 14 kơnòl broă ờ hềt lơh sir, den tàng Phó Thủ tướng ồng Nguyễn Hoà Bình sồr pal lơh sir ală kơnòl broă do tàm qúy 1 nam 2025. Anih duh broă Jơi bơtiàn pal sền gĭt kơnòl broă, jơh nùs lơh ngan, kơnòl cíñ trị gơ wèt mờ làng bol jơi bơtiàn dồ ết nă cau mờ tiah kơh bơnơm, jat tàm gùng dà broă lơh bơh Đảng, Jơnau lơh nền tàm pơrjum bơh Quôk hội mờ ală gùng dà broă lơh dờng. Phó Thủ tướng ồng Nguyễn Hoà Bình, đơs: “Gùng dà broă lơh uă, priă jền bơcri priă uă, den tàng dilah bol he ờ lơh bơta lơi den ờ di ngan ai làng bol in, ai làng bol jơi bơtiàn dồ ết nă cau in den bol he lơh sươ̆i ngan. Den tàng bol he kung pal kơlôi sơnơng mpồl lơh broă tŭ do bơh bol he dê là pal tơrmù niam mờ gơtùi lơh broă rlau mờ mpồl cau lơh broă pa crăp rcang ai broă dờp rò ală kơnòl broă pa. Geh bơta ƀuơn mơya kung geh bơta kal ke sơl. Kal ke là mpồl broă lơh uă rlau, kal ke là mpồl kwang bàng rơ̆p geh tam gơl bơh hơđang tus hơđơm, mơya tŭ tơngai niam là tơnguh tai priă jền nàng bơsong jơnau là sơlơ bơtàu tơnguh rài kis bơh làng bol dê ”.

Phó Thủ tướng ồng Nguyễn Hoà Bình kung sồr, nam 2025 pơnđơl pràn lơh ngan pal lơh jơh geh hìu ơm ai cau rƀah in mờ tơl bơta pơn đơl pràn mờ lơh ngan; mờ nam 2025 kung pal tơn jơh broă lơh jơnau kờñ Dà lơgar bơtàu tơnguh lơh sa- mpồl bơtiàn tiah làng bol jơi bơtiàn dồ ết nă cau mờ tiah kơh bơnơm tơngai dơ̆ 1 mờ rcang niam ngan ai tơngai dơ̆ 2 bơh broă lơh dê, lơh ngan ờ gŏ di lời kơnòl broă lơi tơngai dơ̆ 1 bơh broă lơh dê gam dồs.