Pơnrơ bè Kông ty Bơcri priă bal Banana Brothers Farm, kơnhoàl M’Drăk, càr Dăk Lăk pa tăc 100 tấn prìt tus drà lơgar Lo mờ Hàn Quốc; Kông Ty Kong kơnòl is Ban Mê Green Farm neh kĭ sră cih kah mờ sră hơ tăc rlau 100 container sầu riêng tus mờ cau tam klăc lơh broă bal. Uă mpồl lơh sa kă bro bơh Dăk Lăk dê neh rơcăng lài tam gơl pa, lơh niam ngan ală broă nàng tơngguh uă cồng nha lơh geh, bơta niam phan bơna, lơh geh jơnau sồr ngai sơlơ uă bơh drà kă bro ală lơgar dê.

Sờh Broă lơh sa sươn sre mờ Bơtàu tơngguh ƀòn lơgar càr Dăk Lăk pà gĭt: nam 2025, càr pơn jăt tai tơrgùm yờ tơngguh uă bơta niam phan bơna phan lơh geh bơh sươn sre, lơh geh jơnau sồr tăc mờ lơgar ndai. Dồ tềl sơñio chờ hờp ndai tàm tăc phan lơh geh bơh sươn sre mờ lơgar ndai tàm càr Dăk Lăk là bơnah kơphê niam uă, kơphê bơkah pơnrơ is pơn jăt tai geh ală drà ală lơgar sền gròi. Bal mờ kơphê tăc gar, ală phan bơna kơphê lơh gơlik phan niam uă bơh càr dê kung rơhời đơs nền geh bơngă tŭ geh măt tàm uă dà lơgar, kơnhoàl ù tiah ală lơgar. Tàm hơ̆, geh ală drà kal ke bềng bơta pràn, bè: Mỹ, Nhờk, Hàn Quốc, câu Âu.