Cồng nha do tơnggŏ priă lơh geh bơh làng bol dê gơguh uă ngan kơnờm bơh ală bơta phan lơh geh bơh sươn sre tờm ngan giă gơguh uă ngan nisơna. Tàm hơ̆, is ồn bă kơphê kơnhoàl dê geh pơgăp 22 rbô lồ, kơphê lơh geh rlau 55 rbô tấn, cèng wơl priă jền rlau 6 rbô 600 tơmàn đong. Bal mờ hơ̆, kơnhoàl Dăk Mil geh rlau 5 rbô 300 lồ tiêu, sầu riêng, mờ bàr pe bơta chi sa plai priă jền uă, nam do òr ndrờm lơh geh cồng nha uă.

Jăt ồng Lê Văn Hoàng, Củ tịc Anih duh broă Làng bol kơnhoàl Dăk Mil dê yal, broă lơh sa sươn sre niam uă neh pơgồp bơnah kwơmàng tàm ală cồng nha lơh geh tơl làm bơh kơnhoàl dê nam 2024 tŭ jơh 12 broă jàu lơh sa- mpồl bơtiàn ndrờm geh mờ sơrlèt broă rơndăp lơh dê jàu. Gơguh lơh sa kơnhoàl dê nam 2024 geh 9,19%, mờr bàr dơ̆ khà gơguh bơh càr Dăk Nông dê.