Tàm ƀùi drim, mpồl lơh broă neh tus còp, gờm chờ Sa tềp mờ pà phan ai kwang bàng, cau ling Pôs đồng ling sền gàr tiah nhàr lơgar Tuy Đức (Gah đơng lam Mpồl ling sền gàr tiah nhàr lơgar càr dê); Đại đội Ƀộ Biñ 3 (Gah đơng lam Mpồl ling klàng kơnhoàl Tuy Đức). Di dơ̆ do, Mpồl lơh broă bơh Dà lơgar neh jàu pà 50 bơnah phan pà tus ală hìu bơnhă geh rài kis kal ke mờ 20 bơnah phan pà kơnòm bơsram là kòn ròng ală pôs đồng ling sền gàr tiah nhàr lơgar.

Mho dồ ngai bal, Phó Củ tịc Quôk hội ồng Trần Quang Phương bal mờ mpồl lơh broă Dà lơgar neh còp, gờm chờ Sa tềp kwang bàng, cau ling mờ làng bol tàm sàh tiah 3 Dăk Ngo, kơnhoàl Tuy Đức, càr Dăk Nông. Phó Củ tịc Quôk hội jờng rơ broă gơnoar atbồ tiah do neh pơn đơl pràn lơh ngan lơh jat niam ngan broă lơh sền gròi Sa tềp ai làng bol in. Jơh nùs lùp còp, gờm chờ sa tềp ală kra ƀòn, cau geh bơngă pin dờn là làng bol jơi bơtiàn dồ ết nă cau, Phó Củ tịc Quôk hội kung đơs sùm gơnoar bơh kra ƀòn, cau geh bơngă pin dờn dê. Do là mpồl tờm, pơgồp bơnah ai gùng dà broă lơh mờ adat boh lam bơh Đảng, Dà lơgar dê tus mờ làng bol, mơkung tus bal jơh nùs tàm broă bơt bơtàu mpồl tam klăc dờng jơh gùt làng bol.