Ala mat kwang đơng lam bồ Đảng, Dà lơgar, Phó Củ tịc Quôk hội ồng Trần Quang Phương jơh nùs lùp còp, pơndờm pơnđiang kwang bàng kông đoàn, đoàn viên, cau lơh phan, cau lơh broă, is ồn là đoàn viên, cau lơh broă geh rài kis kal ke, cau gơtìp rềs àr lơh broă, cau kòp kơn jơ̆, cau ờ sô ờ soàn tàm mpồl bơtiàn. Phó Củ tịc Quôk hội bal mờ mpồl lơh broă neh jàu pà 300 bơnah phan pà Sa tềp tus mờ đoàn viên, cau lơh broă geh rài kis kal ke.

Phó Củ tịc Quôk hội sồr kấp ủy, gơnoar atbồ ală kấp tơrgùm  bơtàu tơnguh lơh sa, kơ̆ kơl jăp sền gàr Dà lơgar, lơngăp lơngai pơgồp bal mờ bơtàu tơnguh rài kis phan bơna, nùs nhơm làng bol ală jơi bơtiàn tàm ù tiah càr dê, lơh jat niam rlau tai broă lơh dong kờl gàr tơl niam rài kis mpồl bơtiàn, tơrmù rƀah kơ̆ kơl jăp. Dùl ngai bal, Mpồl lơh broă neh tus còp, pà phan pà ai Kwang bàng, cau ling Pôs đồng ling sền gàr tiah nhàr lơgar Ia Rvê, Mpồl lơh sa Sền gàr Dà lơgar 737, kwang bàng, kra ƀòn mờ hìu bơnhă geh sră dong kờl Dà lơgar, kơnòm bơsram geh rài kis kal ke tàm ù tiah kơnhoàl tiah nhàr lơgar Ea Súp.