Tus tŭ do, Jơnau rơcang cih adăt tam gơl Adăt Lơh broă Jăt sền bơh Quốk hội mờ Mpồl duh broă làng bol bơtơl 51 bơta tàm 91 bơta pơn drờm mờ Adăt tŭ do geh mờr 60%.

Phó Củ tịc Quốk hội ồng Trần Quang Phương pà git tàm pơrjum dơ̆ 9 tus do, Quốk hội rơ̆p sền sơwì broă tam gơl, bơtơl Sơnoa boh lam, Adăt Rơndăp broă gơnoar atbồ ƀòn lơgar mờ uă jơnau rơcang cih Adăt ndai, tàm hơ̆ geh uă tơngu me gơrềng bal tơn tus Adăt Lơh broă jăt sền bơh Quốk hội mờ Mpồl duh broă làng bol, ai geh jơnau kờñ pơn jăt tai kơlôi sơnơng tam gơl tơl ală bơta gơwèt mờ jơnau rơcang cih adăt. Phó Củ tịc Quốk hội ồng Trần Quang Phương đơs loh pal lơh jăt broă tam gơl pa bồ tơngoh, tam gơl pa broă lơh adăt, nàng gàr niam adăt bơsong geh ală bơta gơkòl mùl màl tàm broă lơh jăt sền. Pal pơn jăt tai kơlôi sơnơng nàng lơh adăt di pal niam yal Quốk hội pơgồp jơnau đơs tàm pơrjum dơ̆ 9.