Tơnơ̆ tŭ iat ală mpồl yal, đơs pơn dut, Phó Thủ tướng ồng Hồ Quốc Dũng đơs sùm, broă bơtàu tơnguh măi mok kuơmàng pơgồp bal mờ bơta bơtàu tơnguh bơh dà lơgar dê là bơta kuơmàng ngan; den tàng, ală ƀộ, gah broă lơh dà lơgar pal lơh broă bal; pal khin cha bơcri priă, dờp bơta aniai, ngui bơta ƀuơn “lòt tơnơ̆” nàng lòt gùng kòn, coă bồ. 

Phó Thủ tướng sồr tàm nhai 4 do tơn: tơng gơs Jơnum lơh broă ală gah; ală ƀộ, gah broă lơh yal mat ală bơta mờ ai lơh jat mat ală bơta măi mok kuơmàng. Tơnơ̆ hơ̆ ală ƀộ pal lam lơh mơ tơn kơnòl broă mờ dan priă jền tă lơh. Bal mờ hơ̆, ală ƀộ: Jak chài mờ măi mok, Priă jền, Bơto bơtê mờ Bơsram pal lơh pràn bơto bơtê cau lơh broă, lơh sir gùng dà broă lơh priă jền. Ƀộ Bơto bơtê mờ Bơsram kờñ pal geh broă lơh krơi is nàng hòi jà bơto bơtê cau lơh broă măi mok kuơmàng.