Tềng đăp bơta kơn jơ̆ bè priă tă bơcri lơh tài bơh giă phan gơguh uă, trồ tiah lơh aniai, tu kòp aniai gơlik geh kal ke mờ sồr geh bơta bơkah niam phan bơna ngai sơlơ uă, Mpồl lơh broă bal Vĩnh Cường ơm tàm sàh Vĩnh Mỹ (càr Cà Mau) neh tơrgùm sơlơ tơnguh tai broă tus bal ală anih lơh bal lơh sa- tăc bro kòi phe jat Ală jơnau lơh nền 1 tơlak lồ kòi bơkah, tơrmù tuh tơlik nhơm bơ̆ bơdìh ờ uă tiah Ring dà dờng Cửu Long. Tŭ do, broă lơh sa suơn sre bơh Mpồl lơh broă bal Vĩnh Cường dê là rlau 10 rơbô lồ, tàm hơ̆ geh pơgăp 5 rơbô lồ lơh bal lơh kòi jat jơnau sồr bơkah uă. Bơta krơi is tàm ală anih lơh bal dê là geh bơta tus bal bơh mpồl lơh sa kă bro dê bơh sơn rờp tơn. Broă pà sơntìl, bơto pơlam bơta chài tam phan, gròi sền cồng nha lơh geh tus tăc bro phan lơh geh bơh broă lơh sa suơn sre lơh jat sră pơrgon loh làng. 

Ồng Trịnh Văn Cường – Lam bồ Mpồl lơh broă bal Vĩnh Cường pà gĭt, cồng nha bơh ală anih lơh bal ờ mìng tơngŏ tàm priă lơh geh gơguh uă tai lơm mờ gam tàm bơta tam gơl bồ tơngoh kơlôi sơnơng lơh broă sa bơh cau lơh broă sa dê tai. Bơh tiah ntoăt jat cồng nha lơh geh, ală cau tàm Mpồl lơh broă bal tam gơl tus sền gròi bơta bơkah niam, jòi gĭt tiah tờm tam phan mờ sàng goh phan ngui sa. Ồng Trịnh Văn Cường pà gĭt: “Mpồl lơh broă bal ờ gơtùi lơh broă jat broă lơh yau ờ, suơ̆i bơta song dơ pă, suơ̆i bơta tàm jàu mờ kờñ mut bal tàm mpồl lơh sa làng bol dê lơh is, Mpồl lơh broă bal pal geh ală cau lơh broă atbồ ờs mờng, geh broă rơndăp lơh kă bro, geh gròi sền priă jền, geh broă lơh kwơ màng drà kă bro ờs mờng, mìng pin dờn Mpồl lơh broă bal gơ gơs bè dùl mpồl lơh sa ngan ngồn rcang lài tus bal rcang lài ală anih lơh bal, ală bơta kwơ”.

Rài lơh sa Việt Nam gam tam gơl jat gùng dà tơlir, tàm pơdar mờ ngui sồ ngan ngồn, den tàng tàm tiah lơh sa mpồl bal, mpồl lơh broă bal ơm tềng đăp jơnau sồr pal tam gơl pa tơl làm bè bồ tơngoh kơlôi sơnơng rơndăp broă lơh sa. Broă tàm tơrbŏ bal mờ ală mpồl lơh sa làng bol dê lơh is geh sền là broă lơh kwơ màng nàng ală mpồl lơh broă bal in tơnguh uă bơta pràn jak tàm pơrlòng, gơ dờp ngăc ngar mờ broă lơh drà kă bro dê.

Jat mò Nguyễn Thị Hoàng Yến - Phó Lam bồ Kụk Lơh sa Lơh broă bal mờ bơtàu tơnguh ƀòn lơgar (Ƀộ Broă lơh sa suơn sre mờ Tiah ơm kis), uă Mpồl lơh broă bal geh broă lơh sa gam dềt, suơ̆i bơta pràn jak lơh gơlik phan mờ bơta pràn gĭt nền drà kă bro gam ờ hoan pràn. Bơta do lơh phan bơna gơ ơm tàm bơta “geh kàl tơnhào mơya tăc ờ yòm”, lơh sa suơ̆i bơta pơlam gùng dà jŏ jòng. Tàm tŭ hơ̆, tiah lơh sa làng bol dê lơh is den geh bơta ƀuơn bơta pràn bè priă bơcri, măi mok,  mpồl tam pà bal mờ bơta pràn tus bal mờ drà kă bro tàm lơgar mờ ală lơgar. Broă chồl pràn tàm tơrbŏ bal lơh bal đah ală Mpồl lơh broă bal mờ mpồl lơh sa làng bol dê lơh is rơ̆p hời rơ hời lơh geh ală anih lơh broă geh kwơ kơnhăp kơ̆. Mò Nguyễn Thị Hoàng Yến đơs loh cơng tàng: “Dilah bè broă lơh sa suơn sre tam gơl tus broă lơh dờng, tơlir kơnhăp kơ̆ mờ lơh jat ală jơnau sồr den jơnau sồr pal jòi gĭt tiah tờm lơh gơlik phan nàng tơnguh bơta song dơ pă, mờ bol añ gŏ là dilah bè mpồl lơh sa kă bro bơcri priă lơh, măi mok mờ atbồ mpồl lơh broă bal rơ̆p lam lơh sa gròi sền bơta bơkah niam pal niam. Mờ dilah bè lơh geh 2 broă ndrờm bal do den bol he rơ̆p gŏ geh bơta kwơ bơh mpồl lơh sa kă bro, Mpồl lơh broă bal mờ cau lơh broă sa tam gơl bơh lơh bal dồ nă să tus mpồl lơh broă jơh nùs”.

Nàng broă lơh lơh bal đah Mpồl lơh broă bal mờ mpồl lơh sa làng bol dê lơh is bơtàu tơnguh kơnhăp kơ̆ den bơta pràn priă jền là dùl tàm bơta geh gơnoar broă tờm. Ngan ngồn pà gŏ, uă Mpồl lơh broă bal kung gam gơtìp kal ke tàm broă gĭt mờ priă càn tài bơh ờ tơl phan bơna tàm ala, bơta pràn jak atbồ priă jền gam ờ pràn. Bơta do lơh mpồl Lơh broă bal kal ke bơcri priă blơi măi mok halà pờ ơnàng tiah tam phan. Tŭ ală Mpồl lơh broă bal tus bal mờ ală anih lơh bal mờ mpồl lơh sa kă bro, bơta hoàc huơr càn priă rơ̆p gơmù uă ngan kơnờm geh sră pơrgon lơh broă dong kờl mờ priă jền geh sùm.

Mò Cao Xuân Thu Vân - Củ tịc Mpồl Lơh broă bal Việt Nam đơs là, bơtàu tơnguh ală anih lơh bal là jơnau sồr gơ jal ngan nàng bơt bơtàu broă lơh lơh sa mpồl bal kơnhăp kơ̆. Ală anih lơh bal rơ̆p lơh geh bơta gơn kơnờm sơlơ tơnguh tai broă tam gơl sồ tàm tiah lơh sa mpồl bal, mpồl lơh broă bal. Bơta do dong tơnguh uă bơta song dơ pă, ờs mờng ngan ngồn tàm broă lơh mờ gơ hòi gơ jà rơnàng lơh broă kơnòm să tus bal lơh broă tàm tiah lơh sa lơh broă bal. Den tàng, tàm tơrbŏ bal mpồl lơh broă bal mờ mpồl lơh sa làng bol dê lơh is ờ mìng là gùng dà lơm mờ gam là jơnau sồr ờ gơtùi pleh klàs nàng tơnguh uă bơta pràn jak tàm pơrlòng bơh broă lơh sa suơn sre Việt Nam dê tàm ală anih lơh broă tăc phan gùt plai ù dê. Mò  Cao Xuân Thu Vân đơs sùm: “ Tàm lơh broă bal mờ he dan bơta nđàc bơh cau ndai dê den kal ke ngan, mờ pal geh bơta ring bal, kờñ ring bal den pal lơh sa jat jơnau sồr. 2 là jòi gĭt tiah tờm lơh gơlik phan tơl làm mpồl lơh sa kă bro dong kờl mpồl lơh broă bal. Mờ tŭ tơl dờng pràn rao den Mpồl lơh broă bal rơ̆p geh cau tàm mpồl tơnguh is Mpồl duh broă atbồ mờ bơcri priă lơh is bơh kơl dung priă bơh he dê”.

Mờ ală tam gơl pa bè broă lơh, broă dong kờl bơh Cíñ phủ dê tàm tơngai bơtàu tơnguh pa, mpồl lơh sa bal, mpồl lơh broă bal ờ gam là tiah “ờ pràn tai” mờ digơlan gơ gơs dùl “bơta tàm tơrbŏ bal” kwơ màng tàm mpồl lơh sa làng bol dê lơh is. Tŭ “bơta tàm tơrbŏ bal” mpồl lơh broă bal geh dong kờl di khà rơ̆p gơ gơs bơta gơn kơnờm kwơ màng sơlơ tơnguh tai ală bơta kwơ broă lơh sa suơn sre Việt Nam dê bơtàu tơnguh kơnhăp kơ̆, bơh hơ̆ pơgồp bơnah tam gơl niam broă lơh broă sa, tơnguh uă priă lơh geh ai cau lơh broă sa lơgar he dê in.