Tơm boh bơr mờ ală cau ala mat, Tổng Ƀí thư, Củ tịc lơgar ồng Tô Lâm đơs nền, tàm ală nam do, tềng đap bơta đơng lam bơh Đảng, Dà lơgar dê, bơta lơh broă ndrờm bal bơh jơh gùt anih lơh broă cíñ trị dê, bal mờ bơta lơh ngan bơh ală tiah mờ làng bol kòn cau dê, broă lơh prap gàr mờ lơh niam bơta kuơ niam chài ală jơi bơtiàn neh lơh geh uă cồng nha kuơmàng, lơh gơlik bơta tam gơl niam jơh bal bè bồ tơngoh git wă mờ rài kis mpồl bơtiàn. 

Kuơ màng rlau, broă lơh prap gàr niam chài ngai sơlơ gơ jat bal đềt mềr mờ mpồl bơtiàn. Tơngai tus, Tổng Ƀí thư, Củ tịc lơgar ồng Tô Lâm sồr mờ kơp kờñ, ală cau chài pơn jat tai bơto wơl cau kơnòm să in, nàng dà đơs, gùng đơs pơnđik, broă lơh bơh yau geh tàm pơn jat tai tàm rài kis tŭ do. Gơtùi đơs, gam dà đơs, gam bơhiàn bơh yau, gam ală gùng đơs pơnđik – jơnau tam ya là gam huềng bơh jơi bơtiàn dê, mờ kung kờñ pal sền gròi lơh gơlik bơta niam nàng niam chài geh lam lơh ngan ngồn tàm rài kis, geh ù tiah nàng sền gàr mờ lơh gơ rề, nàng tơl nă làng bol, tơl mpồl bơtiàn ngan ngồn gơ gơs là cau tờm bơh broă prap gàr mờ bơtàu tơnguh niam chài dê.