Anih duh broă làng bol càr Gia Lai pa bơyai lơh pơrjum bơsong ală broă gơ rềng tus broă lơh ai ù lơh rơndap broă lơh gùng rơndeh lòt mhar Quy Nhơn – Pleiku. Uă bơta gơ kòl mùl màl neh geh đal git, sồr pal geh bơta pơn đơl dờng ngan nàng tă bơsong, wèt tus lơh gơs lài mờ 30/4 nam do. Bè ală bơta gơ kòl, giă priă tơm wơl jat Jơnau lơh nền sồ 30 nam 2025 bơh Anih duh broă Làng bol càr Gia Lai dê lơyah rlau mờ giă mùl màl drà kă bro, lơh gơbàn kal ke tàm broă hòi jà làng bol jàu ù nàng lơh rơndap broă lơh.

Phó Củ tịc Anih duh broă Làng bol càr Gia Lai ồng Nguyễn Tự Công Hoàng sồr ală sàh, sơnah ƀòn, mpồl lơh broă lơh mhar broă ai ù lơh rơndap broă gàr bơta loh làng, di jơnau sồr; mờ kung gờñ rơndap ƀòn ơm kis pa, lơh ngan jàu ù lài mờ ngai 30/6 tus, gàr ală bơta pal geh drơng rài kis in. Rơndap broă lơh gùng rơndeh lòt mhar Quy Nhơn – Pleiku (càr Gia Lai) jòng 125 kơi sồ, geh 4 bơnàng gùng, răt rơndeh lòt geh bơceh lơh là 100 kơi sồ dùl jơ, lòt gan 16 sàh, sơnah ƀòn bơh càr Gia Lai dê. Jơh gùt gơl gùng do geh mờr 4 rbô 789 hìu bơnhă làng bol gơtìp gơ rềng, tàm hơ̆ mờr 620 hìu bơnhă làng bol kờñ pal geh rơndap ƀòn ơm kis pa, bal mờ rlau 6 rbô 300 broă lơh, phan bơna măi mok pal ntrờn.