Tàm bơta priă tă nàng pơn diang phan mờ phan blơi lơh broă gơguh priă, Kông ty Yến sào Khánh Hoà kung gam geh sùm gơguh lơh sa niam. Quý I nam 2026, priă geh tơrgùm bal bơh mpồl lơh sa kă bro dê geh di pơgăp 1 rơbô 40 tơmàn đong, gơguh 19% pơn drờm mờ tŭ do nam lài, lơh gơs rơlao 30% broă rơndăp lơh priă geh tàm nam. Jăt mò Trịnh Thị Hồng Vân, Củ tịc Mpồl duh broă tàm Kông ty Yến sào Khánh Hoà yal, mpồl lơh sa kă bro lơh pràn broă hòi jà kă bro phan, rề ơnàng drà kă bro tăc phan mờ lơgar bơdìh, tàm hơ̆ uă ngan là drà kă bro lơgar Lo.

Mờ kông ty lơh jăt broă gùng dà broă lơh nàng tơrmù priă tă, nàng gàr kơl jăp priă tăc, gàr niam bơta pràn tàm pơrlòng phan geh lơh. “Ală drà kal ke bè lơgar Mỹ, Australia, Canada ndrờm geh jơnau kờñ uă, mơya jơnau kờñ jòi anih lơh gơs bơh drà kă bro lơgar Lo dê gam nền nòn rơlao, bơh tàm broă lơh, lơh gơs phan tus mờ broă tăc mờ lơgar bơdìh mờ tam pà bal. Den tàng, mpồl lơh sa kă bro gam pơn jăt tai pơgồp bal mờ ală gah lơh broă bal mờ tập đoàn dờng tàm lơgar Lo nàng rề ơnàng drà kă bro mờ bơtàu tơnguh măt kă bro Yến sào Khánh Hoà dê”.

Ndrờm bal mờ broă lơh ngan bơh mpồl lơh sa kă bro dê, broă tìp hòi jà bơcri priă nam 2026 càr Khánh Hoà dê kung tơrgùm hòi jà geh bơta pràn bơh ală lơgar tus bal tàm ală gah broă tờm bè lơh sa mờ măi mok, năng lượng, lòt nhơl, broă lơh drơng ala mờ tiah drà, bơ̆t bơtàu. Jơnau kờñ tàm nam do là hòi jà geh 2 rơndăp broă bơcri priă FDI kờp kơh priă bơcri bơh 100 tơlăk Dolar Mỹ rơlao hờ đang. Ồng Trần Minh Chiến, Kwang lam bồ Mpồl atbồ Tiah lơh sa mờ ală Tiah lơh sa mờ măi mok càr Khánh Hoà pà git, broă hòi jà bơcri priă geh mpồl lơh broă do ai ală gah lơh broă mùl màl, tơrbŏ bal mờ ală anih lơh broă cri bơyai broă mờ lơgar ndai mờ mpồl lơh broă ală lơgar dê nàng yal geh dơ̆ bơcri priă tus tàm càr in. “Tŭ ală cau bơcri priă lơgar bơdìh kờñ jòi sền nàng git, bè ờs ală cau do rơ̆p dan mờ kwang atbồ anih ala măt bơh lơgar tờm lài. Den tàng, di lah he ai tơl jơnau tơngit nàng ală Kwang atbồ anih ala măt lơgar bơdìh in git den rơ̆p ƀuơn ngan. Bơh bơta git gơ̆p do, kwang atbồ anih ala măt lơgar bơdìh kung gơtùi yal mờ dong kờl tơrbŏ bal mờ cau bơcri priă. Bol añ rơ̆p jà tơn ală cau bơcri priă mờ he kờñ bơcri priă, jà cau bơcri priă do tus sền, nàng git mùl màl”.

Bơdìh mờ broă hòi jà bơcri priă, càr Khánh Hoà kung lơh pràn broă hòi jà kă bro phan, dong kờl mpồl lơh sa kă bro rề ơnàng drà kă bro phan mờ lơgar bơdìh. Dùl gùng dà broă lơh pa là tus tàm drà kă bro Halal, do là drà kă bro geh rơlao 2 tơmàn nă cau ngui sa tàm dunia dê. Ală mpồl lơh sa kă bro tàm càr geh dong kờl lơh gơs broă dờp bơh Halal dê, tơnguh uă bơta niam phan geh lơh mờ rề ơnàng drà tăc phan mờ lơgar bơdìh ală bơta phan geh bơta pràn.

Tàm gah lòt nhơl, càr Khánh Hoà pơn jăt tai hòi jà tus tàm ală drà kă bro tờm bè lơgar Hàn Quốc, Ấn Độ mờ Nga; mờ bơyai lơh geh ală mpồl famtrip bơh mpồl lơh sa kă bro lòt nhơl ală lơgar dê tus sền anih tus bal mờ phan lòt nhơl. Jăt ồng Trương Văn Tiến, Kwang lam bồ Anih tờm hòi jà Bơcri priă, Kă bro phan mờ Lòt nhơl càr Khánh Hoà đơs, ală broă hòi jà rơ̆p pơgồp bal rề ơnàng drà kă bro cau năc bơh ală lơgar dê, mờ lơh pràn broă ngui sa mờ tăc phan mờ lơgar bơdìh tàm do tơn bơh broă lòt nhơl. “Tàm bơta tŭ do, bol añ lơh pràn broă ngui sa tàm dơlam lơgar, mờ pơn jăt tai rề ơnàng tàm ală drà kă bro mờ càr neh lơh broă bal, tàm hơ̆ uă ngan là ală tiah ờ hoan gơrềng tam gơl bơh bơdìh dê. Bơh ală broă hòi jà mờ tơrbŏ bal, lòt nhơl kung rơ̆p pơgồp bal lơh pràn broă ngui sa mờ tăc phan mờ lơgar bơdìh tàm do tơn”.

Jăt ồng Nguyễn Việt Hùng, Củ tịc Anih duh broă Làng bol càr Khánh Hoà đơs, broă hòi jà bơcri priă bơh càr dê gam tam gơl bơh broă lơh ờ rơcang lài tus mờ broă lơh rơcang lài jòi ală cau bơcri priă kwơ màng, ai bơh tàm bơta pràn bè lơh sa dà lềng, anih ơhò ơm dà lềng mờ logistics: “Càr Khánh Hoà geh uă bơta pràn, tàm hơ̆ uă ngan là bè anih ơhò dà lềng ơm mờ logistics. Tàm tơngai tus, bơ̆t bơtàu bơta pràn hòi jà ală cau bơcri priă pràn tàm dunia tus bơcri priă. Tŭ ală cau bơcri priă dờng tus tàm càr, bơta niam mpồl lơh sa kă bro dê kung rơ̆p geh, pơgồp bal tàm broă lơh geh tơl ală tiah lơh sa mờ măi mok”.

Mờ pơlam gùng lơh pràn lơh broă mờ lơgar ndai drơng bơtàu tơnguh jăt nùs nhơm Jơnau lơh nền tàm pơrjum 59 bơh Ƀộ Cíñ trị dê, bal mờ broă lơh ngai sơlơ rơcang lài mờ di pal tàm hòi jà bơcri priă kă bro phan mờ lòt nhơl. Càr Khánh Hoà gam rơhời rề ơnàng drà tăc phan mờ lơgar bơdìh, gơhòi gơ jà tai bơta pràn bơh ală lơgar dê, lơh gơlik bơnàng jă nàng càr bơtàu tơnguh pràn lơh sa dà lềng mờ drơng broă sa priă tàm tiah Đah Jum Tàm gùl lơgar dê.