Tơnơ̆ 01 nam lơh jăt Jơnau lơh nền tàm pơrjum bơh Ƀộ Cíñ trị dê bè tiah mờ broă lơh bơh mpồl duh broă pơgồp bal đơng lam tiah Tây Nguyên, mpồl duh broă tiah neh geh uă broă lơh, ai lơh jăt uă jơnau sồr, gùng dà broă lơh gơcèng bơta lơh nền nàng chồl tơngguh gơguh bơh Tiah Tây Nguyên dê. Kờp jơh GRDP nam 2024 bơh tiah Tây Nguyên dê geh rlau 484 rbô tơmàn đong; GRDP kờp bal dồ nă cau kờp dŭ geh 78 tơlak 500 rbô đong dồ nă dồ nam, gơguh 16% pơndrờm mờ nam 2023. Tàm dơ̆ pơrjum, kwang đơng lam bồ ală càr tiah Tây Nguyên neh tă pơgồp uă jơnau đơs nàng bơtàu tơngguh tiah Tây Nguyên tàm tơngai tus.

Pơndŭt dơ̆ lơh broă, Phó Thủ tướng Duh broă sùm ồng Nguyễn Hoà Bình đơs sùm, 6 rơndăp broă lơh phan bơna gam lam lơh nàng tàm tơrbŏ Tây Nguyên mờ ală tiah tờm kwơmàng. Bulah bè hơ̆ tŭ do pa geh rơndăp broă lơh gùng lòt Dăk Lăk- Nha Trang tŭ tơngai lơh niam, gam wơl 5 rơndăp broă lơh lơyài ngan, geh rơndăp broă lơh pa ai priă 8% lơm. Phó Thủ tướng sồr ală tiah pơgồp bal mờ ală gah geh gơnoar nàng jòi gùng tă bơsong, lơh mhar tơngai lơh rơndăp broă lơh, gờñ lơh geh ală bơta pràn bơh tiah Tây Nguyên dê.