Phó Thủ tướng ồng Nguyễn Hòa Bình gờm chờ ală mpồl Đảng, Mpồl Lơh kơnòl broă sùm 2 kấp mờ ală kwang bàng geh sồr, geh pồ mờ pin dờn là ală kwang bàng rơ̆p lơh jat niam gơnoar, kơnòl broă, di pal mờ kơnòl broă geh jàu, drơng broă Làng bol, pơgồp bơnah bơt bơtàu càr bơtàu tơnguh bal mờ jơh gùt lơgar tàm rài brồ să. Phó Thủ tướng ồng Nguyễn Hoà Bình sồr mpồl kwang bàng, kông cứk càr Lâm Đồng pa mhar mut lơh broă, lam lơh geh cồng nha ală kơnòl broă. Sồr ală kwang bàng geh jàu broă, geh pồ pal lơh jat niam nùs nhơm, geh kơnòl mut lơh broă mơ.

Ồng Y Thanh Hà Niê Kdăm, Ƀí thư Tỉñ ủy càr Lâm Đồng pơyoa jơnau ưn ngài uă ngan tus Ƀộ Cíñ trị neh pin dờn pồ ồng tus bal tàm Mpồl lơh kơnòl broă sùm mờ jào kơnòl kwơ màng at gơnoar broă Ƀí thư Tỉñ ủy. Ƀí thư pa càr Lâm Đồng hơ rơ̆p lơh nga tơnguh nùs nhơm tam klăc bal, pơgồp bal nền nòn mờ mpồl đơng lam, Mpồl Lơh kơnòl broă sùm Tỉñ ủy mờ kwang đơng lam ală càr tơnơ̆ tơmŭt bal, nàng ai càr pa bơtàu tơnguh di pal mờ bơta geh, di pal mờ jơnau kơ̆p kờñ bơh Đảng, Dà lơgar bal mờ Làng bol dê. Jăt mờ hơ̆, càr rơ̆p ngui uă ngan ală bơta kwơ neh geh is lài, tàm hơ̆ geh bal bơta niam tiah kơh bơnơm, tiah jăt gah dà lềng mờ ală bơta kwơ niam chài krơi is càr dê nàng bơ̆t bơtàu broă lơh jŏ jòng bơtàu tơnguh lơh sa mpồl bơtiàn jŏ jòng.

Tơlik nùs nhơm pin dờn tềng đăp mờ broă lơh do, ồng Điển Minh, kis tàm sàh Đức An, càr Lâm Đồng đơs: “Ngai 01 nhai 7 neh gơs dùl càr pa, rơ̆p geh uă jơi bơtiàn ơm kis bal, bè kòn cau Mnông, Yoah, Rơđê, Jrai, K’ Ho hơ̆ sồng Nùng, Tày mờ uă jơi bơtài ndai tai. Bè bơta niam chài ờs mờng tơl jơi bơtiàn geh bơta niam chài krơi is, bè jơnau đơs pơn đik, cing mồng, ñô sa chờ kung ndrờm bal sơl. Tìp bal jơh ală jơi bơtiàn tàm càr Lâm Đồng dê nàng ală cau in git, geh bal ală càr ndai ndrờm git bè bơta niam chài ờs mờng”.