Tàm dơ̆ tìp măt, còp mờ pà phan Satềp ai 400 hìu geh sră dong kờl, hìu rơƀah mờ cau lơh phan, cau lơh broă geh rài kis gơtìp kal ke, Phó Thủ tướng neh còp să, chờ gờm ală cau, ală hìu geh dùl Satềp hờm ram, tơl, gơboh gơbài.

Phó Thủ tướng đơs sùm, Cíñ phủ tơrgùm lơh jăt ndrờm bal ală gùng dà broă lơh tơrmù rơƀah kơl jăp, gàr niam khà kis ờ uă ngan mờ ală broă lơh drơng ala mpồl bơtiàn dê, drơng bơta niam rài kis bơh làng bol in; dong kờl bơtàu tơnguh lơh sa, kơl jăp rài kis jŏ jòng ai hìu rơƀah in. Phó Thủ tướng sồr ală ƀộ, gah lơh broă dà lơgar, ală càr, ƀòn dờng pơn jăt tai lơh jăt ală gùng dà broă lơh bè tơrmù rơƀah, tàm hơ̆ uă ngan là 3 broă lơh jơnau kờñ dà lơgar; lơh ngan lơh gơs ờ uă ngan di pơgăp 100 rơbô nơm hìu ai cau rơƀah, cau lơh phan tàm nam 2025 in.