Tàm dơ̆ lòt sền, Phó Thủ tướng ồng Trần Hồng Hà đơs lài do tài bơh làng bol, mpồl lơh sa kă bro ờ hềt bơcri priă dồ bă di pal mờ ngan ngồn; sră nggal, jơnau yal ờ tơrgùm geh den tàng kal ke ngan nàng kờp sền dong kờl bè lơi ai gơ in di pal. Mơya, broă tơrmù priă cồng bơh anih priă jền, jàu tiah ròng phan tàm dà lềng mờ dồ ròt broă dong kờl ndai in geh lam lơh neh bơnah lơi dong làng bol bơtàu tơnguh wơl lơh sa.

Gơrềng tus broă jàu tiah ròng phan tàm dà lềng ai ală mpồl cau, cau dồ nă să in, Phó Thủ tướng tơngkah càr Quảng Ninh pal đơs ală bơta kòl yal tàm tiah do dê nàng Cíñ phủ in geh ală bơta nàng bơsong. Gơrềng tus broă tàm jàu măi mok ròng phan, kơ̆ kơl jăp jŏ jòng, măi mok pa....Phó Thủ tướng sồr sền sơwì ală broă lơh bơtàu tơnguh lơh ală anih tờm lơh gơlik sơntìl geh cồng nha ngan nàng cau dồ nă să, mpồl lơh sa kă bro in tus bal.