Poh sơnrờp rê wơl mờ hìu bơsram, ơdŭ bơsram bơh ùr pơgru kơnòm să bi Lê Thị Hồng Anh, 25 sơnam, ơm tàm sàh Cư Êbuôr, ƀòn dờng Buôn Ma Thuột, geh bơyai lơh tàm nùs nhơm ờ gơtùi đơs ngan. Ià pơ àr hòi lòt ling tàm tê, Hồng Anh geh bơnah lơi pơlai soh mờ uă rlau là bơta chờ hờp tài bơta kơ̆p kờñ gơ gơs dùl nă ling geh griăt neh at tàm tê. Mờ jat bi Hồng Anh, gơ gơs cau ling là broă nàng bi tàm pơn jat tai bơhiàn hìu bơnhă, dùl bơta kơ̆p kờñ bơh tŭ gam dềt bi dê. Bi Lê Thị Hồng Anh, đơs: “Mò đah bèp añ dê là Mè Việt Nam khin cha Jak chài, bàr pe nă oh mi đah mò mờ kòn mò dê là cau ling chơ̆t màng, deñ kờñ ngan dà tơlir ào ling dê. Bơh sơn rờp, mè bèp añ kơlôi kơnơng tài bơh añ là kòn ùr, lòt tàm tiah pơlam tàp bòl glar, trồ tơngai duh, trồ mìu. Mơya, gŏ añ jơh nùs, hìu bơnhă neh pơndờm pơnđiang mờ kờñ. Den tàng, añ lơh nền kis jơh nùs jơh tồr mờ rơnàng kơnòm să mờ cih sră dan lòt ling is kơnòl pal lơh ling klàng”.

Ai Đảng viên kơnòm să Phương Bắc Bkrông (20 sơnam, kòn cau Rơđê, ơm tàmƀòn Cuăh, sah Ea Na, kơnhoàl Krông Ana) kung lời ing broă bơsram sră tàm hìu bơsram kao đẳng, cih sră dan lòt ling. Phương Bắc kơlôi tiah ling klàng là tiah is ồn nàng rơnàng kơnòm să in pơlam tàp, jơh bal bè pràn kơl dang să jan mờ bơta chài, bơta gĭt wă mờ bồ tơngoh: “Mut tàm mpồl ling, añ rơ̆p lơh ngan bơsram tàp niam ală jơnau pơlam tàp võ nàng tơnguh uă pràn kơl dang să jan. Añ kung rơ̆p tơrgùm bơsram ală bơta jơnau bơsram cíñ trị niam ngan nàng gĭt loh rlau tai bè kah yau jơi bơtiàn, bơh hơ̆ tơnguh uă nùs nhơm kơ̆ dơn cíñ trị mờ pơn đơl pràn lơh ngan gơ gơs cau ling Wa Hồ dê”.

Neh tus bal lơh kơnòl pal lơh Ling klàng tàm nam 1990, ồng Y Tách Bkrông, bèp bơh bi Phương Bắc Bkrông dê, jơh nùs ngan kờñ, pơndờm pơnđiang kòn lòt lơh kơnòl broă ling klàng dơ̆ do nàng kòn in tă pơgồp dà kơl hề, mơkung bơsram tàp să jan tàm tiah ling klàng, bulah pal lời ing wơl broă bơsram sră. Ồng Y Tách Bkrông, đơs: "Añ pơndờm pơnđiang bồ tơngoh ai sau in crăp rcang lòt gùng lòt ling. Tiah pơlam tàp tàm mpồl ling sùm kal ke ngan, bòl glar ngan, sồr pal bơsram is, bơsram tàp nàng tơnguh uă nùs nhơm mờ bơta duh rơngòt kơrnoat boh lam. Sau pal lơh ngan pơnđơl pràn sơr lèt gan 3 nhai pơlam tàp nàng gơtùi ơm tàm mpồl Ling klàng Làng bol Việt Nam, pơgồp bơnah lơh jat nùs nhơm kơ̆p kờñ ngan bơh rơnàng kơnòm să dê nàng sền gàr ƀòn lơgar, Dà lơgar”.

Kàl rơwah ling nam do, càr Dăk Lăk hòi kham pràn kơl dang să jan ai 10 rơbô 373 nă làng bol. Tàm hơ̆, 2 rơbô 553 nă làng bol tơl ală bơta lòt ling, geh bal 3 nă cau ùr, 8 nă đảng viên, 162 nă neh jơh bơsram đại họk, kao đảng halà trung kấp. Đại tá Niê Ta, Đơng lam bồ Gah đơng lam Mpồl ling klàng càr- Phó Củ tịc Mpồl rơ wah ling càr Dăk Lăk pà gĭt, broă lơh jàu- dờp ling neh geh ală mpồl ling mờ ală tiah rcang niam ngan, crăp rcang lam lơh tàm ngai 13 nhai 2 do. Đại tá Niê Ta jờng rơ, 100% làng bol lòt ling dơ̆ do geh pràn kơl dang să jan niam, gĭt wă loh bè kơnòl bơh să tờm dê:“Nam do geh rlau 500 nă làng bol kơnòm să tàm càr cih sră dan lòt ling is, uă rlau ală nam lài uă ngan, do là tềl tơngŏ chờ hờp ngan. Rơnàng kơnòm să tŭ do neh gĭt wă rlau tai tàm broă gĭt wă kơnòl mờ kơnòl pal lơh bơh să tờm dê gơwèt mờ kơnòl broă bơt bơtàu, sền gàr Dà lơgar. Ală oh ndrờm geh bơsram uă, crăp rcang tă pơgồp bồ tơngoh, bơta pràn nàng bơt bơtàu mpồl ling klàng di pal mờ pa ngan”.

 Ală làng bol kơnòm să bè bi Lê Thị Hồng Anh, Phương Bắc Bkrông halà uă bơyô kơnòm să ndai tàm càr Dăk Lăk dê, bulah rài kis krơi is, mơya ndrờm geh nùs nhơm lơh ngan uă kờñ tàm pơrdờn đòm jat bơhiàn kăc màng mờ tă pơgồp bơta pràn kơnòm să dê ai broă lơh sền gàr Dà lơgar. Khi gam kis jơh nùs mờ rơnàng kơnòm să mờ lơh gơrề uă nùs nhơm kờñ gơboh Dà lơgar tàm mpồl bơtiàn.