Lơh jăt jơnau jơh nùs lơh ngan bơh Ƀộ Cíñ trị dê, nhai 03 nam 1975, dơ̆ Ntàu tam lơh dờng mờ guh ntàu bơh ling klàng mờ làng bol he kàl Prang nam 1975 sơnđờm geh lơh mờ ai geh bơta pha lin sùm. Pe dơ̆ tam lơh dờng: Dơ̆ tam lơh Hồ Chí Minh bơh chờm mờ dơ̆ tam lơh nisơna tam lơh sơgràm geh Buôn Ma Thuột, tơngklàs Tây Nguyên; Dơ̆ tam lơh tơngklàs Huế- Đà Nẵng mờ Dơ̆ tam lơh Hồ Chí Minh tơngklàs Sài Gòn – Gia Định.

Ală ngai lồi dŭt bơh dơ̆ tam lơh dê, bulah ling cau sò tơm gơtìp lơh gơprah gơpreng jơh mơya bol sò tơm kung gam jòi tơl ală broă lơh ngan rơcăng gàr nàng kơryan cơnđoà jơng lòt sò tơm bơh ling he dê. Ngai 26 nhai 04 nam 1975, tơnơ̆ dùl tŭ tơngai ntrờn làm bă tiah sơrbac mhar ngan, lòt ndang tam lơh mờ bol sò tơm ndang mơkung bơtơl tai mpồl ling, 5 ling mpồl tờm ngan bơh Ling tơngklàs dê tam pà gơs 5 đah dùl tŭ bal lòt tam lơh tàm tiah tờm ƀòn dờng Sài Gòn – Gia Định.

Tus 11 jiơ 30 phuk ngai 30/04/1975, Kwang ătbồ lơgar Việt Nam Kộng hoà ồng Dương Văn Minh mờ jơh ală gơnoar ătbồ Việt Nam Kộng hoà pal pờ tê ờ jai tam lơh mờ ờ duh pal geh bơta lơi. Dơ̆ tam lơh Hồ Chí Minh jai pha jơh.

Tam lơh pha lin dờng kàl prang nam 1975 lơh tềl bơta tam gơl lơh nền, ai jơi bơtiàn he mŭt tàm rài “lơngăp lơngai is, tơrgùm dùl, làng bol lơh tờm mpồl bơtiàn ring bal”, mơkung lơh hô hơng pràn kơldang ngan srơh dong klàs jơi bơtiàn mờ tam lơh tài ring lơngai, gơguh jak tàm dunia. Đại tướng ồng Phan Văn Giang, Kwang bàng Ƀộ Cíñ trị, Phó Ƀí thư Anih duh broă đơng lam Đảng ling klàng Dà lơgar, Ƀộ trưởng Ƀộ Ling klàng, đơs nền: “Di 11 jiơ 30 phuk ngai 30/04/1975, Dơ̆ tam lơh Hồ Chí Minh jơh, tơn jơh geh cồng nha dơ̆ ntàu tam lơh dră wơl bol sò tơm Mỹ thàm phà, dong kờl dà lơgar. Hơ̆ là cồng nha lơh geh dipal ngan ai ală gùng lòt tam lơh bềng bòl glar kal ke, bơta lòng bal mờ ală phi să hoàc hươr roh rui dờng ngan bơh ling klàng mờ làng bol he. Tam lơh pha lin dờng kàl prang nam 1975 là cơng tàng đơs nền gùng dà kăc màng rơcăng lài, bơceh lơh, broă rơndăp lơh đơng lam dipal ngan bơh Đảng dê; là tam lơh pha lin bơh bơta pràn tam lơh làng bol dê, tơnggŏ loh làng ngan bơh nùs nhơm gơboh lơgar pơgồp bal kơ̆ kơl jăp ngan mờ bơta kơ̆p kờñ ngan tơrgùm dùl Dà lơgar mờ kơ̆p gơn ngan ring lơngai, bơh bơta pràn tam klăc jơi bơtiàn dê, pơgồp bal mờ bơta pràn tŭ tơngai dê”.

Tơnơ̆ nggùl rài, jơh gùt lơgar gam pơn jăt tai gàr niam cồng nha lơh geh mờ jơnau bơsram mờng chài bơh Tam lơh pha lin dờng kàl prang nam 1975 dê, cơnđòa mŭt tàm rài pa, brồ guh tus pas sơm, bơngă pràn “làng bol pas, lơgar pràn, làng bol lơh tờm, ring bal, jak chài”.